Այսօրվա ասուլիսին ՀՀ ԱԺ ԲՀԿ խմբակցության անդամ Միքայել Մելքումյանը ևս մեկ անգամ շեշտել է, որ կողմ են քվեարկել «Շրջանառության հարկի մասին» օրենքին առաջին ընթերցմամբ՝ բայց նշելով, որ երկրորդում շտկումներ պետք է կատարվեն.

«Այո՛, մենք կողմ ենք քվեարկել «Շրջանառության հարկի մասին» օրենքին, որպեսզի շրջանառության հարկը 3,5 տոկոսից դառնա 1 տոկոս, սակայն առաջարկել ենք նաև մեր պայմանները», – ասել է նա՝ հավելելով, որ երեք առաջարկ է արվել։ Դրանցից մեկը եղել է օրենքի ժամանակավոր կասեցումը.
«Ինչպես գիտեք, մենք երկու օր բանակցեցինք Կառավարության հետ, սակայն Կառավարությունը մնաց իր տեսակետին՝ առաջարկելով մեկ լուծում: Ֆինանսների նախարարը հրաման ստորագրեց, որպեսզի ձեռնպահ մնան ՓՄՁ-ներում անհիմն ստուգումներ իրականացնելուց՝ բացառությամբ ռիսկային համարվողների»։
Ինչպես երեկ՝ «եռյակի» հանրահավաքին, այնպես էլ այսօրվա ասուլիսին տնտեսագետ պատգամավորը շեշտել է մանրածախ օբյեկտների փակման մասին. «Սա պաշտոնական թիվ է: Եթե այս կոշտ վարչարարությունը շարունակենք, ապա 10. 500-ի կեսն էլ կփակվի», – մտահոգվել է պատգամավորը։

7or.am