«Կենտրոն» հեռուստաընկերության «Ուրվագիծ» հաղորդմանը հյուրընկալված ՀՀ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանն անդրադարձել է հոկտեմբերի 10–ին Ազատության հրապարակում հրավիրված համապետական հանրահավաքին։

–Հոկտեմբերի 10-ին ժողովրդի մոտ տեսա նոր հույսի, նոր վստահության լույս քաղաքական ուժերի և ԲՀԿ–ի հանդեպ։ ԲՀԿ առաջնորդ Գագիկ Ծառուկյանը նույնպես հրաշալի հասկանում է այն պատասխանատվությունը, որի տակ մտնում է,-ասել է Ն. Զոհրաբյանը՝ հավելելով, որ հանրահավաքի կայացած լինելու մասին է վկայում նաև այն, որ դրանից հետո իշխանությունը ոտքի է հանել իր ժողգործիքների և հաճախորդների ողջ արսենալը.

–Ի դեպ, հաճախորդների վինետկայի որոշակի փոփոխություն ենք նկատում վերջին շրջանում: Տեսնում ենք կլիենտուրայի նոր համույթ՝ այսպես կոչված, չեզոք, «անկախ» վերլուծաբանների անվան տակ: Ինձ համար ցավալի էր, որ այդ հաճախորդների մեջ տեսա անկախության համար պայքարած գործիչներից մեկին, որն այսօր իշխանության սայլը քշում է առաջ: Հին հաճախորդներին գալիս են փոխարինելու նորերը: Ես՝ որպես նախկին լրագրող, կանեմ ամեն ինչ, որ հանրությունն անուն առ անուն ճանաչի իշխանության նոր կլիենտուրային:

Ն. Զոհրաբյանը հավելել է, որ իշխանությունն էլ շատ լավ գիտի՝ իր գնացքը վաղուց գնացել է, և հանրության մոտ ունի զրոյական վարկանիշ:

–Մեր օրակարգը մեկն է՝ այս իշխանությունը սպառել է իրեն և պետք է հեռանա, և որևէ կերպ չպետք է ունենա հնարավորություն՝ «սահմանադրական փոփոխություններ» բլեֆի անվան տակ վերարտադրելու իրեն։ Իսկ եթե չեն հասկացել այս ամենը, ապա կա՛մ ընկալունակության հետ կապված պրոբլեմներ ունեն, կա՛մ իշխանութան նոր վինետկայի ժողգործիքների ներկայացուցիչներն են: Օրակարգը հստակ է,-ընդգծել է Ն. Զոհրաբյանը:

7or.am