Սերժ Սարգսյանի մամուլի խոսնակ Արման Սաղաթելյանը հաղորդել է, որ Սերժ Սարգսյանի վերջնական դիրքորոշումը սահմանադրական փոփոխությունների հայեցակարգի վերաբերյալ, ըստ ամենայնի, հայտնի կլինի 2015 թվականի փետրվար-մարտ ամիսների ընթացքում:

Այսպես թե այնպես, Սարգսյանը պետք է որոշում ընդուներ: Այդ որոշումն իր բնույթով պետք է արտացոլեր նաև նրա ընտրությունը՝ գնալ առճակատմա՞ն, թե՞ խաղաղ ճանապարհով զիջել, նահանջել: Սարգսյանն ընտրեց երկրորդ տարբերակը: Ճիշտ է, այդ որոշմամբ նա իր հետին մտքում նպատակ ունի ժամանակ շահել ու մարել համազգային շարժումը, սակայն իշխանափոխության գործընթացը մեկնարկել է և անշրջելի է:
Պետք է նաև ընդգծել այն փաստը, որ Սարգսյանի այդ որոշումը պայմանավորված է ոչիշխանական քաղաքական ուժերի, մասնավորապես՝ «եռյակի» քաղաքական ջանքերով:

Եկեք համաձայնենք, որ դա զգալի ձեռքբերում է իշխանափոխության ճանապարհին՝ անկախ Սարգսյանի հետապնդած նպատակներից:
Հավանականություն կա, որ «գնացող» նախագահն այժմ որոշակի ակնկալիքներ կցանկանա ունենալ «եռյակից»: Դա նրա իրավունքն է, սակայն պետք է հաշվի առնի, որ բոլոր ակնկալիքները պետք է տեղավորվեն «մարդասիրական միջանցքի» և խաղաղ իշխանափոխության տիրույթում:

«Եռյակը» բազմիցս նշել է, որ թավշյա իշխանափոխության դեպքում կապահովի երաշխիքներ՝ գնացողին «մարդասիրական միջանցք» տրամադրելու երաշխիքների փաթեթ:
Ինչ վերաբերում է համազգային շարժման հետագա ընթացքին, ապա հոկտեմբերի 24-ին պետք է ներկայացվի «ճանապարհային քարտեզը», և ամրապնդվի համապատասխան գործնական քայլերով:
Նեոբոլշևիկյան ռեժիմի անկմանը զուգահեռ՝ պետք է սկիզբ առնի Հայաստանի նոր քաղաքական համակարգը, որը հանդիսանալու է բուրժուադեմոկրատական հեղափոխության արդյունք:

Հ. Գ. Մեկ առիթով նշել եմ, բայց ևս մեկ անգամ շեշտեմ, որ Սարգսյանն ունի բոլոր շանսերը՝ ապացուցելու, որ մեր երկրի քաղաքական կյանքում կարող է մնալ որպես ունիկալ նախագահ: Անկախ ամեն ինչից՝ խաղաղ ճանապարհով պետական իշխանության ղեկը հանձնել ունակ են միայն ունիկալ անձինք. պատմությունն ապացուցել է՝ սեփական կյանքը վտանգել են միայն անմեղսունակները:

Մերի Մովսիսյան