Ա՛յ, եթե սահմանադրական փոփոխություններն արված լինեին, սիբիրյան ցիկլոնը Հայաստան չէր ներխուժի:

Ա՛յ, եթե սահմանադրական փոփոխություններն արված լինեին, Հայաստանում Էբոլայի հնարավոր տարածման վտանգի մասին կանխատեսումներ չէին արվի:

Ա՛յ, եթե սահմանադրական փոփոխություններն արված լինեին, բիոզուգարանները կաշխատեին:

Ա՛յ, եթե սահմանադրական փոփոխություններն արված լինեին, Կոնչիտային չէին ծեծի ու չէին բռնաբարի, ինչի մասին լուրն էլ հայկական ԶԼՄ-ն չէր տարածի:

Ա՛յ, եթե սահմանադրական փոփոխություններն արված լինեին, հակածխախոտային պայքարը կպսակվեր հաջողությամբ:

Ա՛յ, եթե սահմանադրական փոփոխություններն արված լինեին, Եվա Ռիվասը ոտքով չէր քվեարկի:

Ա՛յ, եթե սահմանադրական փոփոխություններն արված լինեին, ՀՀԿ-ական պատգամավորուհու ամուսնության 30-ամյակը կընդգրկվեր պետական տոնացույցում:

Ա՛յ, եթե սահմանադրական փոփոխություններն արված լինեին, Կիեւյան կամրջից նետվելու սպառնալիքով մարդիկ կամրջի բազրիքին չէին հայտնվի:

Ա՛յ, եթե սահմանադրական փոփոխություններն արված լինեին, աշխատող հղի կանայք բողոքի ցույց չէին անի:

Ա՛յ, եթե սահմանադրական փոփոխություններն արված լինեին, Լիսկան դոկտորի կոչում չէր ստանա:

Ա՛յ, եթե սահմանադրական փոփոխություններն արված լինեին, Վարչական դատարանը կբավարարեր Փոստանջյանի հայցն՝ ընդդեմ Գալուստ Սահակյանի:

Ա՛յ, եթե սահմանադրական փոփոխություններն արված լինեին, ՀՀԿ-ի տատին ու ՀՀԿ-ի Գեւորիկը կուսակցության տարածքում «ազդեցության գոտի» ունենալու համար չէին կռվի:

Ա՛յ, եթե սահմանադրական փոփոխություններն արված լինեին, «եռյակի» «անձնափոխության» դավադիր ծրագիրը տապալված կլիներ, ու գործող անձը հավերժ կմնար իր տեղում՝ սրբորեն կատարելով Սահմանադրության մեջ փոփոխված վերոնշյալ բոլոր դրույթները:

Կիմա Եղիազարյան