Ոչիշխանական ուժերի «եռյակի» այսօր կայանալիք հանրահավաքին «ընդառաջ»՝ երեկ ուշ երեկոյան ՀՀԿ-ն գործադիր մարմնի նիստ արեց:

Բնականաբար, նիստի ավարտից հետո իշխող ուժի վերնախավը պետք է ստեր, ու ստեց՝ հայտարարելով, թե նիստում հոկտեմբերի 24-ի հանրահավաքի վերաբերյալ հարց չի քննարկվել:

Ավելի ուշ որոշ լրատվամիջոցներ տարածեցին «Նյու Յորք թայմզ»-ում հրապարակված Սերժ Սարգսյանի հարցազրույցը:

Հարցազրույցի բովանդակությանը ծանոթանալուց հետո պարզվեց՝ այն գրեթե ամբողջությամբ նվիրված է արտաքին քաղաքական խնդիրներին՝ հայ-ամերիկյան հարաբերություններ, հայ-թուրքական հարաբերություններ, թուրքական ու ադրբեջանական իշխանություններից դժգոհություն, Լեռնային Ղարաբաղի խնդիր, Սփյուռք եւ այլն:

Մտածում ես՝ լավ, ի՞նչ մի կարեւոր ու նոր բան է ասել Սերժ Սարգսյանը, որ գիշերվա կեսին որոշեցին անպայման տարածել նրա հարցազրույցը:

Այդ ամենի մասին նա խոսել է անցած շրջանում տարբեր ամբիոններից: Այսինքն,ոչ մի նոր բան չի ասում «Նյու Յորք թայմզ»-ի «զրուցակիցը»:

Դատելով «կանոնակարգված» հարցերից՝ ենթադրելի է, որ այս հարցազրույցը կազմակերպվել է նույն սկզբունքով, ինչը տեսանք սեպտեմբերի 24-ին, երբ «International New York Times» թերթում հրապարակվեց Սերժ Սարգսյանի հոդվածը: Այսինքն, այդ տեքստը «International New York Times»-ում տեղադրվել էր որպես վճարովի գովազդ և ոչ թե որպես հոդված։ Հոդվածը թերթի էլեկտրոնային կայքում այդպես էլ չերեւաց, քանի որ գովազդային նյութերը թերթի առցանց տարբերակում տեղ չեն գտնում:

Թե որքան գումար է վճարվել Հայաստանի պետական բյուջեից «New York Times»-ի գովազդային էջը զբաղեցնելու համար, դեռ ոչ ոքի չի հաջողվել պարզել:

Հիմա էլ նույնը տեսնում ենք «Նյու Յորք թայմզ»-ում, բայց՝ հարցազրույցի տեսքով:

Ավելին՝ Սերժ Սարգսյանի այս ինքնահարցազրույցը մաս է կազմում թերթի վերջին համարում առանձին ներդիրով հրապարակված Հայաստանի մասին անդրադարձին:

Իսկ ասում ենք ինքնահարցազրույց, քանի որ ոչ մի սուր հարց չկա: Անհավանական է, որ «Նյու Յորք թայմզը» բավարարվի միայն այնպիսի հարցով, որ վերաբերում է Սերժ Սարգսյանի «ներշնչանքին»՝ կապված Հայաստանի ապագայի հանդեպ վստահության հետ:

Եթե լսենք ՀՀԿ առաջնորդին, ապա կպարզվի, որ Հայաստանում ոչ մի խնդիր չկա, քանի որ ներքին քաղաքականությունն ամբողջությամբ շրջանցել է, չի խոսում նաեւ իրականացվող սոցիալ-տնտեսական քաղաքականության մասին, հատկապես՝ դրա հետեւանքների:

Մի խոսքով, ամեն ինչ «օքեյ» է:

Հարցազրույցի վերջում Սարգսյանը նշում է. «Վերջին չորս-հինգ տարիների ընթացքում տարեկան մոտավորապես 100 երիտասարդ հայաստանցիներ ավարտել են աշխարհի առաջատար համալսարանները: Ուստի, մենք մեր ժամանակակից ու անվտանգ երկիրը կփոխանցենք ապահով ձեռքերի, ու ես վստահ եմ, որ նրանք այն ավելի ծաղկուն կդարձնեն»:

Ահա սա՛ է Սերժ Սարգսյանի «տեսլականը»:

Այսինքն, հստակ ասում է, թե երբ եւ ում է պատրաստվում փոխանցել երկիրը: Եթե, իհարկե, պատրաստվում է, ինչը չի երևում նրա նախաձեռնած սահմանադրական փոփոխություններից։

Աշխարհի առաջատար համալսարաններն ավարտածները մի քիչ էլ կմեծանան, փորձ ձեռք կբերեն, ու միայն այդ ժամանակ ինքը իշխանությունը կփոխանցի նրանց:

Այսօրվա հանրահավաքից ժամեր առաջ այսպիսի ուղերձ է հղում «եռյակին» Սերժ Սարգսյանը:

Այնպես որ, չպետք է զարմանալ, թե ինչու երեկ այդքան ուշ ժամի որոշվեց տարածել նրա «Նյու Յորք թայմզ»-յան ինքնահարցազրույցը:

Կիմա Եղիազարյան