Գեղամ Նազարյան. «Կոնգրեսավարչախմբական քարոզչամեքենան այս իրավիճակում նաև կոպիտ սխալներ է թույլ տալիս: Մեկ պնդում են, թե անցել են այն ժամանակները, երբ վարչախումբը կարող էր ուժ գործադրել, պատժել, և որ արդեն տեղի է տվել հասարակության ճնշմանը, բայց երբ հարցնում ես՝ բա այդ դեպքում ինչո՞ւ չեք պահանջում Սերժ Սարգսյանի հրաժարականը, ասում են՝ իսկ դուք պատկերացնո՞ւմ եք, թե ի՞նչ կլինի, եթե ժողովրդին հանենք փողոց, ու կրկին ուժ կիրառվի, կամ էլ Սարգսյանը պարզապես հրաժարական չտա:»

Հարութ Սասունյան. «Չնայած նախագահ Օբամային ուղղված ամերիկահայերի համառ հորդորներին` խուսափել Ապրիլի 24-ի ամենամյա ուղերձում Հայոց ցեղասպանության փոխարեն «Մեծ եղեռն» բառեզրը օգտագործելուց, սակայն երեք տարի անընդմեջ նա շարունակում է այդպես վարվել»։

Վարդան Մխիթարյան. «Դատելով Կոնգրեսը ներկայացնող գործիչների արձագանքներից՝ նրանք գոհ են ներքաղաքական զարգացումների ներկա ընթացքից: Հավանաբար՝ Սերժ Սարգսյան–Լևոն Տեր–Պետրոսյան գաղտնի գործարքն արդեն կայացել է, ու դրա համար էլ տերպետրոսյանականները գոհ են ու երջանիկ»։

Ռուբեն Թորոսյան. «Հանրահայտ «երկխոսությանն» ուղղված ՄԻՊ միջնորդության նախաձեռնությունը ողջունելի է, սակայն, մի շարք հանգամանքներ ցույց են տալիս դրա ձևականությունը, մասնավորապես...»։

Գևորգ Լալայան. «Սփյուռքի նախարար Հրանուշ Հակոբյանը հանրահայտ իր ծրագրով «տուն» է կանչում աշխարհասփյուռ հայրենակիցներին, պուտինյան «Հայրենակիցները», ըստ էության, «տնից» մարդկանց հավաքում-տանում է Ռուսաստանի տայգաները: Ճիշտ ստալինյան շրջանի հայրենադարձության ծանոթ դիպաշարով»։

Վարդան Մխիթարյան. «Լևոն Տեր–Պետրոսյանը և վարչախումբն իրենց քայլերով ժողովրդին նախապատրաստում են իրենց հարաբերությունների օրինականացմանը: Այստեղ նրանց գործն ավելի է դժվարանալու, քանի որ արդեն իսկ պարզ է, որ գնալով մեծանում է այն մարդկանց թիվը, ովքեր հասկանում են, որ իրենց օգտագործում են անձնական խնդիրներ լուծելու համար»։

Արման Սահակյան. «Մամուլին օրվա ռեժիմով հետևողները նկատած կլինեն, որ օլիմպիական կոմիտեի ղեկավարի աջակցությունը ձերբակալված մարզիկին համառորեն չտեսնելու տվեցին ընդգծված լևոնական և ընդգծված նախագահական լրատվամիջոցները»։

Գեղամ Նազարյան. «Երբ ունենանք ժողովրդավարական, առողջ տնտեսություն ունեցող պետություն, այդ ժամանակ մենք արդեն կկարողանանք անդրադառնալ և՛ հայ-թուրքական խնդրին, և՛ ԼՂ հիմնախնդրի կարգավորմանը:»

Թաթուլ Հակոբյան. «Այսօր՝ Հայոց ցեղասպանության հերթական տարելիցի նախօրեին, ճիշտ ժամանակն է, որպեսզի Հայաստանի իշխանությունները պաշտոնապես հրաժարվեն առնվազն երկու նախապայման պարունակող հայ-թուրքական երկու արձանագրություններից»։

Վարդան Մխիթարյան. «Լեւոն Տեր-Պետրոսյանի վերջին հարցազրույցը BBC-ին եւ Սերժ Սարգսյանի հայտարարությունը, թե Աղդամը մեր հայրենիքը չէ, եւս վկայում է, որ նրանք Արցախի հարցում եւս նույն տեսակետներն են կիսում եւ նույն մոտեցումներն ունեն»։

Գևորգ Լալայան. «...ասվածի պերճախոս հաստատումներից է նախանցյալ տարի YouTube-ում հայտնված աղմկահարույց մի տեսագրություն, որում աշխարհահռչակ մարմնամարզիկ Ալբերտ Ազարյանի եւ շնորհալի դերասան Հրանտ Թոխատյանի դժգոհությունը նախագահի հիմնական թեկնածուի քարոզչի իրենց կարգավիճակից հասել էր գագաթնակետին»։

Վարդան Մխիթարյան. «Կոնգրեսի առաջնորդներից մեկն առանց հուզվելու պետք է ասի, թե իրենք ամեն ինչ անում են, որ լինեն նախագահի եւ խորհրդարանի արտահերթ ընտրություններ, բայց եթե գործը հասնի հերթական ընտրությանը, ապա մասնակցելու ենք, բայց հրաժարվելու ենք մանդատներից, եթե չստանանք տեղերի կեսից ավելին»։

Գեղամ Նազարյան. «Կոնգրեսականները չեն կարողանում հստակ պատասխանել հարցին, թե ի՞նչ տարբերություն արտահերթ և հերթական խորհրդարանական ընտրությունների միջև, երբ այդ ընտրություններն անցկացնելու է նույն այս վարչախումբը, իսկ Տեր–Պետրոսյանն էլ լարվածության չի գնալու, որպեսզի Ադրբեջանին չգրգռի:»

Վարդան Մխիթարյան. « Եթե շաբաթներ առաջ Լևոն Տեր-Պետրոսյանը և նրա թիմակիցներն ասում էին, թե վարչախմբի հետ բանակցելու են բացառապես արտահերթ ընտրությունների հարցի շուրջ, ապա ապրիլի 8-ին մենք իմացանք, որ եթե վարչախումբը կատարի երեք պահանջիկները, ապա դրանից հետո իշխանության հետ ֆորմալ երկխոսություն է սկսվելու «հասարակության կողմից առաջ քաշված մյուս խնդիրները լուծելու համար»»։

Արմեն Աղայան. «Սա լավ դաս է առաջնորդի հավակնություն ունեցող բոլոր գործիչներին, որ էլ երբեք չգնան ժողովրդի հետևից, հատկապես նրա այն հատվածի, որին առաջնորդում է մի խնդրահարույց անձնավորություն»։

Կարապետ Ռուբիյան. «Չնայած Լեւոն Տեր-Պետրոսյանը հայտարարեց, որ չկամորեն է անդրադառնում «երրորդուժականների» թեմային, ելույթի վերլուծությունը ցույց է տալիս, որ ՀԱԿ պահանջների կրկնակի պարզաբանմանը նա նվիրել էր իր ելույթի մոտ 38 տոկոսը, իսկ «երրորդուժականների» հետ «բանավիճելուն» մոտ 43 տոկոսը, իսկ մնացած մոտ 19 տոկոսը կազմում են ներածությունն ու...»։

Էդիկ Անդրեասյան. «Հիմա արդեն գրեթե համոզված ենք, որ ՀԱԿ-ն իր ընտրապայքարը կառուցելու է երրորդ ուժի դեմ պայքարի ու նրա վրա ցեխարձակումների վրա: Ուրիշ կերպ հնարավոր էլ չէ»։

Գևորգ Լալայան. «Մինչ շահավետ նոր բիզնեսի հոտ առած փողկապավոր ասունները կտան-կառնեն, կմտմտան ոլորտը վերաբաշխելու եւ իրենց կուտակածը մեծացնելու ելքերն ու մուտքերը, Հայաստանի գյուղատնտեսության վտիտ խզակոթին հերթական ծանր հարվածն է սպասվում` այս անգամ ոչխարաբուծության իսպառ կործանման մռայլ հեռանկարով»։