Կարեն Հակոբջանյան. «Սերժ Սարգսյանի PR–ի առանձնահատկությունները հաշվի առնելով՝ զարմանալի էր, թե ինչու նրա թիմը առիթը չօգտագործեց ու երգիչ Իոսիֆ Կոբզոնի երևանյան այցը, համերգը և նախագահի հետ հանդիպումը չներկայացրեց որպես դրսի հերթական «դաբրոյի» ստացման արարողություն։ Կարծում ենք, որ այդ բացը լրացնել է պետք, և մենք այժմ սերժամետ մամուլին կօգնենք այդ հարցում, քանզի Սերժ–Իոսիֆ «դաբրոյահավաք» հանդիպման փաստը չի կարելի շրջանցել»։

Կարեն Հակոբջանյան. ««Ծառուկյանը սատարելու է Սարգսյանին» վարկածի տարածմանը, թերևս, նպաստում է նաև ԲՀԿ առաջնորդի «աղմկոտ լռությունը», որը որոշակի լարվածություն և անորոշություն է առաջացնում, բայց եթե քաղաքական գործընթացները գնահատենք պրագմատիզմի տեսանկյունից, ապա Ծառուկյանի մարտավարությունը շատ հստակ է և զերծ անորոշությունից»։

Կորյուն Մանուկյան. «Սահմանադրության ոգուց և ժողովրդավարական սկզբունքներից բխում է, որ խորհրդարանական փոքրամասնության արտահերթ նիստ հրավիրելու նախաձեռնությունը մեծամասնությունն իրավունք չուներ բոյկոտել, քանզի այդպիսով խախտվում է փոքրամասնության իրավունքը, որը տրվել է 70–րդ հոդվածով։ Եթե մեծամասնությունն իրավունք ունի թույլ չտալ փոքրամասնության իրավունքի իրացումը, ապա 70–րդ հոդվածն անիմաստ բառակույտի է վերածվում»։

Կորյուն Մանուկյան. «Ակնհայտ է, որ ընտրողների ձայներն ստանալու ակնկալիք Սերժ Սարգսյանը չունի։ Նրան պետք են «մեռած» քաղաքական միջավայր և «մեռած» հոգիներ։ Նման պայմաններում Վովան ու ընտրակաշառքը հանգիստ կարող են անել իրենց գործը։ Իսկ եթե «Կոնսենսուս մինուս Սերժ Սարգսյանը» առարկայական տեսք ստանա և ձևավորվի առնվազն միասնական ճակատ, ապա Սերժին չեն օգնի ո՛չ շրջիկ խմբերը, ո՛չ ոստիկանապետը, ո՛չ էլ ԿԸՀ–ն»։

Կարեն Հակոբջանյան. «Սերժ Սարգսյանի համար ճիշտը նախագահական ընտրությունները բոյկոտելն է։ Այդպես նա գոնե ֆորմալ առումով չի պարտվի։ Իսկ թեկնածությունը չառաջադրելու համար հազար ու մի պատճառ կարելի է ներկայացնել։ Օրինակ՝ հիվանդությունը»։

Կորյուն Մանուկյան. ««Բազմանում են սրիկաները, բազմանում»,–հայաստանյան միջավայրին անդրադառնալով՝ նշել էր ոստիկանապետ Վլադիմիր Գասպարյանն իր հարցազրույցներից մեկում։ Ոստիկանապետը ճիշտ ձևակերպում էր տվել, բայց մինչև վերջ չէր անկեղծացել ու չէր նշել, թե ովքեր են այդ սրիկաներին բազմացնում։ Դե ինչ, փորձենք լրացնել այդ բացը և մեր տեսակետները ներկայացնել սրիկայաբույծների մասով»։

Կարեն Հակոբջանյան. «Փորձը ցույց է տալիս, որ «ուսյալներն» ավելի վտանգավոր են, քան «չուսյալները», քանզի վերջինները պատրաստ են ոչ միայն կատարել վերևից եկած հակաօրինական հրահանգները, այլ նաև կրծքով պաշտպանել հակաօրինականությունն ու չամաչել անմեղսունակության կանխավարկածով հանդես գալուց։ Բացի այդ՝ հասարակությունը չպետք է ընտրություն կատարի Սերժին դժկամորեն ծառայող «չուսյալների» և Սերժին էնտուզիազմով ծառայող «անմեղսունակ ուսյալների» միջև»։

Կարեն Հակոբջանյան. «Եթե ոմանք «համակարգային փոփոխություն» ասելով հասկանում են Սերժ Սարգսյանի գլխավորած իշխանական նեղ թիմի կողմից տնտեսական դաշտի վերաձևում և սեփականության վերաբաշխում իրականացնելը, ապա թող բարի լինեն մինչև վերջ անկեղծանալ և հայտարարել, որ իրենք բոլշևիկյան մոդելի կողմնակիցներ են և դեմ են ինչպես մասնավոր սեփականությանը, այնպես էլ ընտրությունների միջոցով ղեկավար ունենալուն»։

Կորյուն Մանուկյան. «Միայն այն հանգամանքը, որ Սերժ Սարգսյանը գրեթե միանձնյա գիշերային որոշում կայացրեց «ֆուտբոլային» դիվանագիտություն սկսելու առումով, արդեն իսկ հզորագույն փաստարկ է, թե ինչու պետք է հրաժարվել գործող Սահմանադրությունից և անցնել խորհրդարանական կառավարման։ Տխրահռչակ «ֆուտբոլային» դիվանագիտությունը հնարավոր չէր լինի կամ գոնե այդ տեսքով չէր լինի, եթե մենք ունենայինք խորհրդարանական կառավարման համակարգ»։

Կարեն Հակոբջանյան. «Տեսակետ կա, թե Տիգրան Սարգսյանը ձախողվել է, քանի որ կիսագրագետ է։ Կա նաև տեսակետ, թե նա ցինիկ է ու փարիսեցի և բարձր բաներից խոսում է՝ քողածածկելու համար «մեկ օլիգարխի տնտեսություն» կառուցելու սերժսարգսյանական ձգտումը։ Ըստ իս՝ երկու տեսակետներն էլ ճիշտ են։ Մենք գործ ունենք անսահման ցինիզմով աչքի ընկնող կիսագրագետ կառավարման հետ»։

Կարեն Հակոբջանյան. «Սերժ Սարգսյանի կողմնակիցները վերջապես հասկացել են, որ նա ստիպված է լինելու մրցել ԲՀԿ–ի կողմից պաշտպանվող թեկնածուի հետ։ Նրանք հասկացել են նաև, որ մրցակից թեկնածուն կարող է դառնալ Գագիկ Ծառուկյանը»։

Կարեն Հակոբջանյան. ««Հանրապետություն» կուսակցությունում և այդ կուսակցության նախագահ Արամ Սարգսյանի հոգում տոն է։ Համաձայնե՛ք, որ այսքանից հետո չէր կարող տոն չլինել «Հանրապետություն» կուսակցությունում, քանզի Արամին հաջողվել է ոչ միայն 12 րոպե 43 վայրկյան անընդմեջ մոտիկից տեսնել ԱՄՆ դեսպանին և սեղմել նրա աջը, այլ նաև ջերմ մթնոլորտում մտքեր փոխանակել, գրողը տանի, մտքե՜ր...»։

Կորյուն Մանուկյան. «Տեղեկություններ կան, որ ՀՀԿ ղեկավարը հիվանդություն ունի և մոտ քսան օր բուժվելու է։ Դե հիմա մարդ է, կարող է նաև հիվանդանալ ու գնալ բուժվելու, բայց արի ու տես, որ սերժամետ լրատվամիջոցներն իրական «բոևիկի» վերածեցին Սերժի արձակուրդը և քաղաքական աստառ տվեցին դրան»։

Կարեն Հակոբջանյան. «Վարչապետն ապրում է այն հույսով, որ ԲՀԿ–ն սատարելու է Սերժ Սարգսյանին։ Եթե նա անկեղծորեն հավատում է դրան, ուրեմն՝ քաղաքականապես անմեղսունակ է։ Իսկ եթե չի հավատում, բայց հայտարարում է, ուրեմն՝ դատարկախոս է»։

Կորյուն Մանուկյան. «Բաղրամյան 26–ում այնպես են իրար խառնվել, որ քարոզչական նպատակներով, բառիս բուն իմաստով, համասերժական մոբիլիզացիա է հայտարարվել։ Ոտքի են հանել բոլորին՝ «բազեներին» ու «ճնճղուկներին», ՄԻԱԿ–ում ծվարած «քաղաքագետներին» ու աչոնիկներին, կարմիրշորտիկավորներին ու փուչիկամոլներին, դատարկ դհոլներին ու լրատվական դաշտի գեղամյաններին, ահելներին ու ջահելներին, զարուհիփոստանջյաններին ու նիկոլփաշինյաններին»։

Արեգնազ Մանուկյան. «Դե քանի հանրապետականները հոկտեմբերի 27–ի մասին են հիշել, փորձենք հենց ՀՀԿ–ականներից պարզել, թե այն օրերին ով էր ճիշտ՝ Անդրանիկ Մարգարյա՞նը, ով Սերժի հրաժարականն էր պահանջում, թե՞ ՀՀԿ այժմյան ղեկավարը, ում անարդարացիորեն էին կասկածում հանրապետականները։ Վերջապես, որտե՞ղ կլիներ Սերժ Սարգսյանը հիմա և ի՞նչ կարգավիճակ կունենար, եթե չլիներ հոկտեմբերի 27–ը»։

Կորյուն Մանուկյան. «Չի բացառվում, որ վարչապետն էլ առավոտից–երեկո նստած լինի սոցիալական ցանցերում (կեղծ անվան տակ, ասենք՝ Տիրացու)։ Սերժ Սարգսյանի «ֆեյքությունը» բացառում ենք օբյեկտիվ պատճառներով. ասում են, թե նա համակարգչից օգտվել չգիտի ու ամեն օր նույն բանն է կարդում։ Իսկ դա նշանակում է, որ փեսան կայֆավատ է լինում աներոջ վրա ու գոնե շաբաթը մեկ «refresh» չի անում երկրի թիվ մեկ պաշտոնյայի համակարգիչը»։

Կարեն Հակոբջանյան. «Սերժ Սարգսյանը մոտիկից տեսել է և նույնիսկ ձեռքով բարևել է Ֆրանսիայի նախագահ Օլանդին, ինչն էլ գավառամտությամբ աչքի ընկնող «անկախ» մամուլին առիթ է տվել հորթի հրճվանքով նշել, որ Արևմուտքը և մասնավորապես Ֆրանսիան Հայաստանի նախագահական ընտրություններից առաջ «դաբրո» է տալիս «ֆուտբոլասեր» նախագահին»։