Կորյուն Մանուկյան. «ԱԺ–ում քննարկվող հաջորդ տարվա բյուջեն «անտեր» է։ Հարցն այն է, թե հաջորդ տարվա ընտրությունների արդյունքում ով է տեր կանգնելու նոր բյուջեին՝ տնաբույծ բոլշևիկնե՞րը, թե՞ ժողովուրդը»։

Կարեն Հակոբջանյան. «Անդրադառնալով իմ նախորդ նյութին՝ ՀՀ կրթության ու գիտության նախարար Արմեն Աշոտյանը ֆեյսբուքյան իր էջում գրել է, որ խորհրդանշական կարմիր շոռտիկը դեռ կա, և ինքը պատրաստ է այն նվիրել մեր խմբագրությանը՝ որպես իրեղեն ապացույց, բայց չի նշել, թե հատկապես ինչի՞ իրեղեն ապացույց։ Օրինակ՝ Մոնիկա Լեվինսկին որպես իրեղեն ապացույց պահել էր և հետագայում դատարանին ներկայացրեց այն ներքնաշորը, որը հագած էր եղել ԱՄՆ նախկին նախագահ Բիլ Քլինթոնի հետ մոտիկից հարաբերվելու ժամանակ»։

Կարեն Հակոբջանյան. «Կարեն Ավագյանը, հավանաբար, տարիքի բերումով այնքան էլ ծանոթ չէ իր հարազատ կուսակցության անցած ուղուն և տեղյակ չէ, որ մեր երիտասարդ պետականությանը հարված հասցրած Նաիրի Հունանյանի դեմ հարուցված գործի քննությանը չխոչընդոտելու նպատակով էր ՀՀԿ նախկին ղեկավար Անդրանիկ Մարգարյանը, Ստեփան Դեմիրճյանի ու Արամ Սարգսյանի հետ միասին, պահանջում Ավագյանի ներկայիս շեֆ Սերժ Սարգսյանի հրաժարականը»։

Կարեն Հակոբջանյան. «Փորձը ցույց է տալիս, որ ՀՀԿ–ի ահելների ու ջահելների մեծ մասը չի սիրում պաշտոնաթող մարդկանց։ Այդ ամենը հաշվի առնելով՝ կարելի է միայն պատկերացնել, թե ինչ է սպասվում Սերժ Սարգսյանին 2013թ. հետո։ Ամենայն հավանականությամբ՝ «7 օրը» ստիպված իր պաշտպանության տակ է առնելու ՀՀԿ այսօրվա ղեկավարին՝ կոչ անելով աշոտյաններին ու շարմազանովներին մեղադրել Սերժ Սարգսյանին միայն գործա՛ծ մեղքերի համար»։

Կորյուն Մանուկյան. «Հանուն արդարության պետք է նշել, որ Խոսրով Հարությունյանը պատվերը կատարեց մեծ դժվարությամբ, քանզի ինքն այն մարդկանցից է, ով առաջնորդվում է «Ով՝ էշ, ես՝ փալան» կարգախոսով։ Այդ կարգախոսով առաջնորդվելն է, որ հնարավորություն է տվել Խոսրովին «նստել» կոմունիստների օրոք, Տեր–Պետրոսյանի օրոք, Քոչարյանի օրոք ու հասնել մինչև Սերժ Սարգսյանի նախագահության շրջանը, բայց, ինչպես ասեցինք, ՀՀԿ ղեկավարը դաժան մարդ է և այնպես է անում, որ իր հաճախորդներն այլևս դառնան սերունդների համար անպիտան»։

Կորյուն Մանուկյան. «Պարո՛ն նախագահ, մի բան մտածեք ու Արամին աչքաթող մի՛ արեք։ Խեղճը փրփուրը բերանին ԲՀԿ–ի ու ՀԱԿ–ի դեմ է պայքարում, այսինքն՝ շարժվում է Բաղրամյան 26–ի «գեներալնի լինյայով», իսկ Դուք նրան ընդամենն օգտագործում եք «Միշիկ.am»–ների ու «Միշիկ-press»–ի արտահաստիքային թղթակցի դերում»։

Կարեն Հակոբջանյան. «Նորանկախ Հայաստանում փոքր ու միջին բիզնեսը միշտ եղել է ընդդիմադիր տրամադրությունների կրող, իսկ խոշորը՝ իշխանամետ։ Սկսած 1996թ. նախագահական ընտրություններից խոշոր բուրժուազիան միշտ կանգնել է իշխանության կողքը՝ դեմ գնալով փոքր ու միջին բիզնեսի շերտերի շահերին ու հանրության բողոքական տրամադրություններին։ Արդյունքը եղել է այն, որ օրվա իշխանությունն անընդհատ վերարտադրվել է։ 2013թ. նախագահական ընտրություններն այդ առումով տարբերվելու են նախորդ ընտրություններից»։

Կորյուն Մանուկյան. «Նույնիսկ անզեն աչքով տեսանելի է, որ Բաղրամյան 26–ի տակ աշխատող տարատեսակ «Միշիկ.am»–ները, «Միշիկի-TV»–ները, գեղամյանական ֆունկցիա կատարող «Միշիկ–Press»–ը և «Միշիկ–Comedy»–ն առաջադրանք են ստացել քննադատության թիրախ դարձնել ՀԱԿ համակարգող Լևոն Զուրաբյանին»։

Կարեն Հակոբջանյան. «Թող «Միշիկ.am»–ի «մուտիլովշիկները» Սերժին հանդիպելիս հարցնեն, թե ինչու՞ չի արտահայտվում Օսկանյանի մասով։ Թող հետաքրքրվեն, թե ինչու՞ է թաքնվել Աղվանի ու իրենց հետևում և ձայն չի հանում տարիներ շարունակ ՀՀ արտաքին գործերով զբաղված մարդու մասին։ Անբնական չէ՞ այն, որ պետության 10 տարվա արտգործնախարարին պատգամավորական անձեռնմխելիությունից զրկում են և ուզում ձերբակալել, իսկ ահա նախագահն այդ մասին կարծիք չի հայտնում»։

Կարեն Հակոբջանյան. «Գաղտնիք չէ, որ ԱԺ ընտրությունների ժամանակ «Ժառանգություն»–«Ազատ դեմոկրատներ» կուսակցությունների դաշինքն իր փայ գեղամյանությունն արեց ՀՀԿ–ի օգտին։ Եվ հիմա, երբ Սերժ Սարգսյանի մոտ հաճախորդների դեֆիցիտ է, Րաֆֆին հիշեցնում է իր մասին ու մտերմաբար դիմում ՀՀԿ ղեկավարին, «տիրացու» վարչապետին ու նոտարական գործի վրա շեղված նախարարին։ Բա ուրիշ ի՞նչ անի, երբ «Ժառանգության» խմբակցության 2/5–ը ֆորմալ չի ենթարկվում իրեն, իսկ 3/5–ը՝ ոչ ֆորմալ»։

Կորյուն Մանուկյան. «Հետևելով երիտհանրապետականների պահվածքին՝ գալիս ես այն եզրակացության, որ նախկին երիտհանրապետական Վազգեն Խաչիկյանի «դպրոցն» իր արժանի հետևորդներն ունի։ Չնայած հանուն արդարության պետք է նշել, որ ո՛չ Արմեն Աշոտյանը, ո՛չ Էդուարդ Շարմազանովը, ո՛չ Կարեն Ավագյանը կենսաթոշակառուների մեծ բարեկամ Խաչիկյանի «կլասը» չունեն։ Խաչիկյանը «երիտհանրապետական» տեսակի օրենսդիրն է, և այդ տեսակի մեջ առանձնանում է մյուսներից»։

Կարեն Հակոբջանյան. «Բաղրամյան 26–ը ստեղծել է ստի ու կեղծիքի տարածման գեբելսյան ոճով աշխատող մի քարոզչամեքենա, որի մեջ կարևորագույն տեղ է հատկացված «ընդդիմադիր» Նիկոլ Փաշինյանին, ում պատկանող «Հայկական ժամանակն» ամբողջությամբ ինտեգրվել է միշիկական համակարգին ու վերածվել տպագիր մամուլի դաշտում «1in.am»–ի ֆունկցիան կատարող գործիքի։ Այսինքն՝ Նիկոլ Փաշինյանը Սերժ Սարգսյանի փեսա Միքայել Մինասյանի համար դարձել է տպագիր մամուլի դաշտի «Արման Բաբաջանյան–2»–ը»։

Կարեն Հակոբջանյան. «Մինչ Գորիկ Գուրգենիչը փորձում է դուրս գալ Ռամիլ Սաֆարովի մասով Սերժ Սարգսյանից ստացած հատուկ հանձնարարության տակից, նույն Սերժ Սարգսյանն առիթից օգտվում (ընդ որում՝ 4 օր առաջ ընկնելով) և Հանրապետության օրվա առթիվ շնորհավորում է Թուրքիայի նախագահ Գյուլին»։

Կորյուն Մանուկյան. «Դատելով ամենից՝ Տիգրան Սարգսյանին, իրոք, կարող են պետք գալ Յուլյայի խորհուրդներն ու փորձի փոխանակումը։ Եթե «բարեշրջիչի» բարձր հովանու ներքո 16 մլն դոլարի կարգի փող է լվացվում միայն գյուղացիներին դասախոսություններ կարդալու անվան տակ, ապա Բիձինային հանդիպելը ժամանակի անիմաստ վատնում է։ Ճիշտը Յուլյայի հետ հանդիպելն է»։

Կարեն Հակոբջանյան. «Դատելով սերժամետ լրատվամիջոցների և «անկախ» վերլուծաբանների հիստերիկ պահվածքից՝ Բաղրամյան 26–ում հոգեխանգարմունքի են ենթարկվել «բուրժուադեմոկրատական հեղափոխություն» ձևակերպումից»։

Կորյուն Մանուկյան. «Ըստ ՀՀԿ–ականների՝ Գագիկ Ծառուկյանը հայտարարություն չի արել 2011թ. հուշագրի՝ ուժը կորցրած լինելու մասին, հետևաբար՝ հուշագիրն ուժի մեջ է։ Եթե ՀՀԿ–ականների տրամաբանությամբ առաջնորդվենք, ապա նույն Ծառուկյանը չի հայտարարել նաև, որ Տիգրան Սարգսյանը, ասենք, կովկիթ չէ, բայց դրանից չի կարելի չէ՞ եզրակացնել, որ Տիգրան Սարգսյանը կովկիթ է»։

Կարեն Հակոբջանյան. «Ինչու՞ ենք զարմանում ԱԳՆ շենքի վաճառքի պահով։ ՀՀԿ ղեկավարն ավելի վտանգավոր գործարքների էր գնում ու միայն Ալիևի էշության և Էրդողանի ագահության պատճառով Հայաստանը փրկվեց (գոնե այս պահի դրությամբ)։ Մի խոսքով, թեթև է պետք տանել այն, որ Պետգույքի կառավարման վարչության պետը շուկայի առևտրականի բառապաշարով խոսում է «կակոյ նիբուծ» ԱԳՆ շենքի վաճառքի մասին։ Նրա վաճառածն ընդամենը շենքն է կամ ավելի ճիշտ՝ ԱԳՆ շենքի վաճառքի արդարացումը։ Եկեք պետությու՛նը փրկենք վաճառքից»։

Կորյուն Մանուկյան. «Դատելով շրջանառվող տեղեկություններից՝ Սերժ Սարգսյանն այժմ ուզում է «քաղաքակիրթ» տեսք տալ փայմտնոցիին և գործընթացն այդ վստահել իր փեսային՝ Միքայել Մինասյանին՝ Միշիկին։ Ասել է թե՝ ՀՀԿ ղեկավարը «երկրորդ սերնդի բարեփոխման» է գնում և հանրությանն առաջարկում է ուրախանալ այն բանով, որ «չար» օլիգարխ Սաշիկի փոխարեն այժմ փայ մտնելու կամ բիզնես խլելու ֆունկցիան վստահված է «բարի» երիտօլիգարխ Միշիկին»։