Թուրքական «Հյուրիեթ» թերթի փոխանցմամբ՝ Սիրիայի նախագահ Բաշար Ասադը սկսել է աջակցել Թուրքիայում ահաբեկչական հռչակված ու արգելված Քրդական աշխատավորական կուսակցությանը։ Իր հերթին «Ռոյթերս» գործակալությունը հաղորդում է, որ Թուրքիայի իշխանությունները Քաթարի ու Սաուդյան Արաբիայի հետ համատեղ համակարգում են սիրիացի ապստամբներին։

ՄԱԿ–ի զեկույցն այնքան սուր խոսքեր է ուղղել Ադրբեջանի հասցեին, որ վերջինիս ԱԳՆ–ն հայտարարել է, թե նման զեկույց չկա և Հայաստանը ուղղակի հորինել է այն։ Ի գիտություն Ադրբեջանի մասնագիտական անկարողությամբ տառապող դիվանագտետների՝ զեկույցին ծանոթանալու համար դժվար չէ այցելել ՄԱԿ–ի պաշտոնական կայք...

Իրանի հոգևոր առաջնորդ այաթոլա Ալի Խամենեին հայտարարել է, որ Իրանի նկատմամբ ճնշումների ուժեղացումը չի կարող ստիպել իրենց հրաժարվել միջուկային ծրագրերից։ Ըստ ZMAN.com-ի՝ Խամենեին ընդգծել է, որ ԱՄՆ–ի և Իսրայելի գլխավորությամբ Իրանի հակառակորդների ճամբարը օրեցօր թուլանում է։

Հարութ Սասունյան. «Տասնամյակներ շարունակ թուրք կեղծ պատմաբաններն ու պրոպագանդիստները արտառոց պնդումներ են անում, որ թուրքերը նախահայրերն են աշխարհի տարբեր էթնիկ խմբերի, ներառյալ՝ ամերիկահնդկացիների, սև ամերիկացիների և որ ամենատարօրինակն է՝ մելունջենցիների՝ Ապալաչյան լեռներում բնակվող թխամաշկ բնակիչների»։

ՄԱԿ–ի զեկույց. «Ադրբեջանի ռազմական բյուջեի զգալի ավելացումը վերջին տարիներին, ինչպես նաև ադրբեջանական ղեկավարության մշտական ագրեսիվ ու կոշտ ռազմական հռետորաբանությունը մեծացնում են երկու ազգերի միջև անդունդը, ավելացնում լարվածությունն ու վտանգում առկա խնդիրների, մասնավորապես ղարաբաղյան հակամարտության խաղաղ կարգավորմանն ուղղված բանակցային գործընթացը»:

«Իրանն արդեն ի վիճակի հարստացնել ուրանը մինչև 20% մակարդակ, սակայն եթե Արևմուտքը շարունակի ճնշում գործադրել մեզ վրա, մենք հարստացման մակարդակը կբարձրացնենք մինչև 56%»,–ասել է Իրանի հոգևոր առաջնորդ այաթոլլահ Խամենիի օգնական Ռեզա Տակավին։

Թուրքիայի Հաքքարի նահանգում գիշերը տեխնիկական խնդիրների պատճառով վայրէջքի ժամանակ ռազմական ուղղաթիռ է կործանվել։ Զինծառայողներից 5–ը զոհվել է, 6-ը վիրավորվել։ Թուրքիայի նախագահն ու վարչապետը ցավակցել են զոհերի հարազատներին:

Իրանցի պաշտոնյաներն առայժմ ոչ մի մեկնաբանություն չեն տալիս նախաձեռնությանը՝ հայտարարելով, որ այդ հարցի վերջնական որոշումը կկայացնի մեծն այաթոլահ Ալի Խամենեին: Նշենք, որ Հորմուզի նեղուցի միջոցով շուկա է ուղարկվում աշխարհում արդյունահանվող նավթի 20%-ը:

ԼՂՀ նախագահական ընտրությունների վերաբերյալ ԵԱՀԿ Մինսկի խմբի հայտարարության մեջ ասվում է, որ համանախագահները գիտակցում են՝ Լեռնային Ղարաբաղի «դե ֆակտո» իշխանությունները նման գործընթացների միջոցով կարիք ունեն իրենց բնակչության հասարակական կյանքը փորձել կազմակերպել ժողովրդավարական սկզբունքների հիման վրա, սակայն դրանք որևէ կերպ չեն կանխորոշում Լեռնային Ղարաբաղի վերջնական իրավական կարգավիճակը...

«ՈւխտԱրարատի». «Սիրիահայության անվտանգության եւ ապագայի խնդրով պատասխանատվություն են կրում բոլոր այն ուժերը, որոնք կամ հրահրել են սիրիական ճգնաժամը, կամ գործուն մասնակցություն ունեն դրանում: Այդ ուժերն են՝ ԱՄՆ-ն, Եվրոմիությունը, Արաբական երկրներից Սաուդյան Արաբիան, Քաթարը…, ապա Թուրքիան եւ այնտեղ տեղակայված սիրիական ընդդիմությունը»։

Հարութ Սասունյան. «Հարկ է նշել, որ ոչ Հայաստանին Տրապիզոնի նավահանգիստի օգտագործման թույլտվությունը և ոչ էլ հուշարձանի կառուցումը չի կարող համարվել Ցեղասպանության փոխհատուցում։ Սրանք պարզապես քայլեր են, որոնք պետք է նախաձեռնեն թուրք պաշտոնյաները ապացուցելու համար իրենց բարի կամեցողությունը...»։

ԵԱՀԿ Մինսկի խմբի ռուսաստանցի առաջին համանախագահ Վլադիմիր Կազմիրովն ընդգծել է, որ ԼՂ–ի հակամարտությունը պատմական համատեքստ ունի՝ Հայոց ցեղասպանություն, 20-րդ դարասկզբին Արցախում բախումներ և այլն, և որ, օրինակ Նախիջևանում ապրող բազմաթիվ հայերի տեղահանել են։

Ստեփանակերտում օդանավակայանի բացման ծրագրի առթիվ ԵԱՀԿ համանախագահները կողմերից հավաստիացումներ են ստացել, որ խնդրին անդրադարձ կկատարվի միայն դիվանագիտական քայլերի տեսքով և հարցը չի քաղաքականացվի, իսկ ադրբեջանական կողմը քաղաքացիական ինքնաթիռների նկատմամբ բռնություն չի կիրառվի։ Այս մասին տեղեկացնում է ԵԱՀԿ-ի պաշտոնական կայքը։

Ռուսաստանի ջավախահայ համայնքը ՀՀ իշխանություններին կոչ է արել պատրաստ գտնվել Ջավախքում բնակվելիք սիրիահայերին ամեն տիպի օգնություն ցուցաբերելուն.«Մենք դիմում ենք Հայաստանի իշխանություններին` խնդրանքով, որ պատրաստ լինեն սիրիահայ փախստականների հարկադիր տարհանմանը և Ջավախքում տեղավորվելուն: Խնդրում ենք նաև նախապես փնտրել հնարավորություններ` վրացական իշխանությունների հետ հնարավոր խնդիրներից խուսափելու համար...»։

ՌԴ նախագահ Վլադիմիր Պուտինի հրավերով, հուլիսի 18-ին Թուրքիայի վարչապետ Ռեջեփ Թայիփ Էրդողանը պաշտոնական այցով կժամանի Մոսկվա։ «Բանակցությունների ընթացքում նախատեսված են երկկողմ հարաբերությունների խորացմանն առընչվող հարցերի լայն շրջանակի քննարկում»,–հայտնում են Կրեմլի լրատվական ծառայությունից։ «Ինտերֆաքս»–ի հաղորդմամբ՝ Պուտին–Էրդողան հանդիպման ընթացքում քննարկվելու են նաև աշխարհաքաղաքական և տարածաշրջանային հարցեր։

Այս տարվա հունիսին ԱՄՆ-ի Ազգային ժողովրդավարական ինստիտուտի (NDI) կողմից իրականացված սոցհարցման տվյալների համզաձայն՝ Վրաստանի բնակչության 69 %-ն իրեն գործազուրկ է համարում։ Հարցվածների 58 %-ը Վրաստանի համար ամենակարևոր հարց է համարել աշխատատեղերի ստեղծումը, 33 %-ը՝ երկրի տարածքային ամբողջականության վերականգնումը, 27%-ը՝ չքավորության խնդրի լուծումը:

ԱՄՆ–ի զինված ուժերի «Ջոն Կ. Սթենիս»հարվածող ատոմային ավիակիրը անսպասելիորեն շարժվում է դեպի Մերձավոր Արևելք։ Ենթադրվում է, որ ավիակրն ուղղությունը բռնել է դեպի Արավիական ծով՝ Իրանի ափերի մոտ։ Հիշեցնենք, որ մարտի 2-ին այդ ավիակիրը վերադարձել էր բազա՝ Վաշինգտոն։

Լրագրողների հետ հանդիպման ժամանակ ռուսաստանցի համանախագահ Իգոր Պոպովը նշել է, որ առաջիկայում չի նախատեսվում Հայաստանի ու Ադրբեջանի նախագահների հանդիպում, սակայն ամառային արձակուրդներից հետո հայ և ադրբեջանցի արտգործնախարարները կրկին կհանդիպեն։