Ունեզրկված գործարար Փայլակ Հայրապետյանը լրագրողների հետ զրույցում ասել է, որ մեղադրյալ Աշոտ Սուքիասյանը նախորդ դատական նիստի ժամանակ իր տված ցուցմունքում ստել է, թե ինքն է կեղծել ՀՀ նախկին վարչապետ Տիգրան Սարգսյանի և Արարատյան Հայրապետական թեմի առաջնորդական փոխանորդ Տեր Նավասարդ արքեպիսկոպոս Կճոյանի ստորագրությունները:

«Ստում է, երբ ասում է, որ Կճոյանն ու Տիգրան Սարգսյանը կապ չունեն, ու ինքն է նրանց ստորագրությունները կեղծել: Այդ ժամանակ Կիպրոսում է եղել Կճոյանը ու Սարգսյանի անձնագրի պատճենն է եղել իր հետ, ամեն ինչ միասին են արել: Ես արդեն միջնորդել եմ, որ գան դատարանում իրենք ցուցմունք տան: Իմ ամբողջ ունեցվածքը` 100 միլիոն, վերցրել են, թող գան ապացուցեն, թե տեղյակ չեն»,-նշել է Հայրապետյանը:

Նշենք, որ այսօր՝ մարտի 31-ին, Էրեբունի և Նուբարաշեն վարչական շրջանների ընդհանուր իրավասության դատարանում պետք է տեղի ունենար «Օֆշորի» գործով հերթական դատական նիստը, որը, սակայն, հետաձգվել է մեղադրյալի և պաշտպաններից մեկի բացակայության պատճառով:

Հաջորդ դատական նիստը տեղի է ունենալու ապրիլի 7-ին:

7or.am