ՀՀ քննչական կոմիտեի Լոռու մարզային քննչական վարչությունում ավարտվել է երրորդ դասարանի աշակերտուհուն դպրոցում կողոպտելու փորձ կատարելու դեպքի առթիվ հարուցված քրեական գործի նախաքննությունը:

2016 թվականի փետրվարի 11-ին գրավոր հաղորդում էր ստացվել առ այն, որ նույն օրը` ժամը 11:45-ի սահմաններում, Վանաձոր քաղաքի թիվ 1 հիմնական դպրոցի զուգարանում մի կին փորձել է կողոպտել անչափահաս աղջկան՝ ականջներից ստիպողաբար հանելով ոսկյա ականջօղերը:

Լոռու մարզային քննչական վարչությունում հարուցված քրեական գործի քննությամբ հիմնավորվել է, որ 2016 թվականի փետրվարի 11-ին Լոռու մարզի Վանաձոր քաղաքի 62-ամյա բնակչուհին, Վանաձոր քաղաքի թիվ 1 հիմնական դպրոցի զուգարանում նույն դպրոցի 3-րդ դասարանի աշակերտուհու առողջության համար ոչ վտանգավոր բռնություն գործադրելով, ականջներից ստիպողաբար քաշելով հանել է ոսկյա ականջօղերը և փորձել բացահայտ հափշտակել դրանք, սակայն իր կամքից անկախ հանգամանքներով՝ հանցագործությունն ավարտին չի հասցրել, քանի որ անչափահասի օգնության կանչից ուսուցչուհիներից մեկը շտապել է օգնության, կանխել, հետ վերցրել ականջօղերը և ահազանգել իրավապահներին:

Ձեռք բերված ապացույցների համակցությամբ՝ 62-ամյա կնոջը մեղադրանք է առաջադրվել ՀՀ քրեական օրենսգրքի 34-176-րդ հոդվածի 2-րդ մասի 4-րդ կետով: Նրա նկատմամբ որպես խափանման միջոց է ընտրվել ստորագրություն՝ չհեռանալու մասին:

Քրեական գործը՝ մեղադրական եզրակացությամբ, ուղարկվել է նախաքաննության նկատմամբ հսկողություն իրականացնող դատախազին: Մեղադրական եզրակացությունը հաստատվել է, և գործն ուղարկվել է դատարան:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ,քանի դեռ նրա մեղավորությունն ապացուցված չէ ՀՀ քրեական դատավարության օրենսգրքովսահմանված կարգով` դատարանի` օրինական ուժի մեջ մտած դատավճռով:

ՀՀ քննչական կոմիտեի դեպարտամենտի
տեղեկատվության և հասարակայնության
հետ կապերի բաժին