Համաձայն Ազգային վիճակագրական ծառայության տվյալների՝ ՀՀ-ում 2010թ. առաջին կիսամյակում գրանցվել է ամուսնալուծությունների 1474 դեպք։ Իսկ ողջ 2009թ.՝ 2829 դեպք։

Ամուսնալուծությունների աճը ԵՊՀ սոցիոլոգիայի ֆակուլտետի դասախոս, սոցիալական աշխատանքի  մասնագետ Աննա Ոսկանյանը պայմանավորում է մի քանի հանգամանքով՝ վաղամուսնություններ, պարտադրված ամուսնություններ և սիրո պակաս։ Մասնագետի կարծիքով՝ ամուսնալուծությունների համար սոցիալ-տնտեսական գործոնը թեև կարևոր է, բայց ոչ էական։ Ա. Ոսկանյանը ցանկալի է համարում, որ հայ երիտասարդները ամուսնանալիս գիտակցեն, թե ինչի են գնում և ամուսնությունը չդիտվի որպես կնոջ ակտիվ կյանքի վերջ։

«Գիտահետազոտական լաբորատորիա» հոգեբանական ծառայությունների կենտրոնի տնօրեն, հոգեբան Մարիամ Մեհրաբյանի խոսքերով էլ՝ ամուսնալուծությունների աճի պատճառներն են կին-տղամարդ դերակատարության փոփոխությունը, ամուսնական զույգերի պահանջարկի և առաջարկի անհավասարությունը, ամուսնությունից հետո նոր իրողությանն ադապտացվելու խնդիրը։

Հոգեբանը նկատում է, որ սկսած Հայաստանի անկախացման տարիներից՝ ամուսնալուծություններն աճում են և դրանց նպաստում են նաև արտագաղթն ու արտագնա աշխատանքները։ Զույգերի սեռական անհամատեղելիությունն էլ մեր երկրում համարվում է ամուսնալուծությունների սքողված պատճառ, քանի որ նրանք չեն էլ գիտակցում, որ իրենց տարաձայնությունները գալիս են հենց դրանից։ Իսկ ամուսնական զույգի անհավատարմությունը Մ. Մեհրաբյանը ամուսնալուծությունների առաջնային պատճառ չի համարում։

7or.am