«Ավրորա» մրցանակաբաշխության միջոցառումների շրջանակում կազմակերպված «Aurora Dialogues» քննարկումները նվիրված են աշխարհում մարդասիրությանն առնչվող ամենահրատապ հիմնախնդիրներին ու մարտահրավերներին։ Մասնակցում են աշխարհի առաջատար գիտնականներ, բարերարներ, մեդիա փորձագետների եւ մարդասիրության ոլորտի առաջատար մասնագետներ:

Ավրորա (Արշալույս) Մարդիգանյանը, որի անունն է կրում մրցանակը, Հայոց ցեղասպանության տարիներին երեխա էր, երբ հոր և եղբայրների սպանության ականատեսը դարձավ։ Հաղթահարելով բոլոր վտանգները՝ նա ողջ մնաց և աշխարհին պատմեց 1915թ. տեղի ունեցած վայրագությունների մասին։ Նա իր կյանքը նվիրել է Հայոց ցեղասպանության մասին բարձրաձայնելուն և 1919 թվականին նկարահանվել «Հոշոտված Հայաստան» ֆիլմում։

«Ավրորա» մրցանակը (Aurora Prize for Awakening Humanity) «100 կյանք» նախաձեռնության բաղադրիչներից մեկն է և շնորհվում է Հայոց ցեղասպանությունը վերապրածների անունից և ի երախտագիտություն նրանց, ովքեր փրկության ձեռք մեկնեցին հայ ժողովրդին: Մրցանակին արժանանալու է մերօրյա այն հերոսը, որն օգնում է մարդկանց անձնվիրաբար և բացառիկ ջանքերով:

Նախաձեռնությունը ձեռնարկել են Վարդան Գրեգորյանը, Նուբար Աֆեյանը և Ռուբեն Վարդանյանը:

«Ավրորա» մրցանակաբաշխությունը տեղի կունենա ապրիլի 24-ի երեկոյան, և դափնեկիրը կստանա 100 000 ԱՄՆ դոլարի պարգև: