Ադրբեջանի ապրիլյան նախահարձակ ռազմական գործողությունների ժամանակ վիրավորված հիվանդների վիճակը այժմ արդեն լավ է և գտնվում են ապաքինման փուլում:

Այս մասին «Արցախպրես»-ի թղթակց հետ զրույցում ասել է ԼՂՀ առողջապահության նախարարության հանրապետական բժշկական կենտրոնի վիրաբուժության բաժանմունքի վարիչ Սերգեյ Մովսիսյանը:

«Ներկա դրությամբ՝ հանրապետական հիվանդանոցում բուժում են ստանում 1 զինվորական և 2 քաղաքացիական անձինք: Ի դեպ բուժում ստացող թալիշցի Ծովինար և Գարեգին Աղաջանյանները հարազատ քույր ու եղբայր են»,- նշել է Ս. Մովսիսյանը:

«Արևիկ» մանկական բուժմիավորման գլխավոր տնօրեն Մեսրոպ Մարգարյանը տեղեկացրել է, որ բեկորային վիրավորում ստացած 12-ամյա Վարդան Անդրեասյանը շարունակում է համապատասխան բուժում ստանալ, իսկ 11-ամյա Գևորգ Գրիգորյանն արդեն դուրս է գրվել և կարողանում է քայլել հենակների օգնությամբ:

«Հենակների օգնությամբ Վարդանը ևս սկսել է քայլել: Վիճակը լավ է. եթե հենակներով կարողանա ազատ քայլել դուրս կգրենք: Վեց ամսից հետո նրան պետք է նորից վիրահատենք (հանելով ազդրի արտաքին ֆիքսացիայի ապարատը), որպեսզի կարողանա երեխան ազատ քայլել»,-ասել է Մ. Մարգարյանը:

Ապրիլի 2-ին Մարտունու շրջանի Ներքին Ճարտար բնակավայրի ուղղությամբ թշնամու կողմից ՄՄ-21 կայանքից իրականացված հրթիռահրետակոծության հետևանքով սպանվել էր 12-ամյա Վաղարշակ Թաթուլի Գրիգորյանը, ևս երկու երեխա՝ 11-ամյա Գևորգ Գրիգորյանը և 12-ամյա Վարդան Անդրեասյանը վիրավորվել են: 12-ամյա Վարդան Անդրեսյանը երկու անգամ վիրահատվել է, կատարվել է ազդրի արտաքին ֆիքսացիա, իսկ Գևորգ Գրիգորյանի վիրակապումն ամեն անգամ ընդհանուր անեսթեզիա տակ էր անցնում։ Ի դեպ, թշնամու արկակոծության հետևանքով զոհված 12-ամյա Վաղարշակ Գրիգորյանը Գևորգ Գրիգորյանի հարազատ եղբայրն է:

«Artsakhpress.am»