Չեխիայի նախկին արտգործնախարար Կարել Շվարցենբերգը հավաստիացած է, որ Չեխիան պետք է ճանաչի Հայոց ցեղասպանությունը:

«Գերմանիան այս քայլով պարզապես փաստեց ճշմարտությունը, և ես կարծում եմ, որ դա լիովին ճիշտ էր. կատարվածը, իրոք, ցեղասպություն էր: Չգիտեմ՝ արդյոք Չեխիայի խորհրդարանը կճանաչի ցեղասպանությունը, թե ոչ, ես պարզապես կարող եմ իմ անունից ասել, որ ես միայն կողմ եմ և հուսով, որ նրանք կանեն դա: Ես հավաստիացած եմ, որ նրանք պետք է դա անեն»,- «Արմենպրես»-ի հետ զրույցում նշել է Չեխիայի նախկին արտգործնախարար Կարել Շվարցենբերգը:

Հունիսի 2-ին Գերմանիայի Բունդեսթագն ընդունեց Հայոց ցեղասպանության ճանաչման բանաձևը, որն ունի «1915 և 1916 թթ. հայերի և մյուս քրիստոնյա փոքրամասնությունների ցեղասպանության հիշատակի և ոգեկոչման մասին» անվանումը: Բանաձևն ընդունվեց ունենալով ընդամենը մեկ դեմ, մեկ ձեռնպահ ձայն:

Օրերս հայտնի դարձավ, որ Չեխիայի նախագահ Միլոշ Զեմանը մտադիր է երկրի կառավարությանն ու խորհրդարանին կոչ անել՝ հետևելու գերմանական օրինակին և պաշտոնապես ճանաչելու 1915-1918 թթ. թուրքերի կողմից իրականացված Հայոց ցեղասպանությունը։ Այս մասին Զեմանը նշել է չեխական «Պառլամենտնի լիստի» օնլայն թերթին տված հարցազրույցում:

«Արմենպրես»