Շուրջ մեկ ամիս առաջ «Ազգային միասնություն» շարժումը Վայոց ձորի մարզում անցկացրեց իր անդրանիկ նիստը, որի ընթացքում մարզի բնակիչները ներկայացրել էին ծրագրեր, որոնց իրագործմանը պետք է աջակցեր «Ազգային միասնություն»-ը:

Նրանցից ամենաերիտասարդը՝ 15-ամյա Կարեն Մաթևոսյանն, առաջարկել էր մարզում զբոսաշրջության զարգացման համար շրջակա միջավայրի բարեկարգման աշխատանքներ իրականացնել մարզի նշանավոր պատմամշակութային հուշարձանների տարածքներում:

«Ազգային միասնություն» շարժման փոխնախագահներ Արամ Սարգսյանին և Վլադիմիր Աղայանին առաջարկը հետաքրքրել էր:

Այսօր արդեն «Ազգային միասնություն» շարժման աջակցությամբ Վայոց ձորի երեք հուշարձան-համալիրի՝ Սուրբ խաչ, Թանահատ ու Սպիտակավոր եկեղեցիների տարածքը մաքրված է, մաքրությունը պահպանել հորդորող պաստառները՝ տեղադրված ու այս ամենն արել են 15 տարեկան դեռահասները:

Ինչպես Vesti.am-ի հետ զրույցում նշել է «Ազգային միասնություն» շարժման Վայոց ձորի կառույցի ղեկավար Վահե Վարդանյանը՝ արդյունքն ակնհայտ է, երեխաները՝ ոգևորված.

-Ողջունելին այն է, որ հայոց բանակի վաղվա զինվորներն են այդ ամենն անում: Ինձ հետ զրուցելիս Կարենն ասաց՝ ուզում ենք մեր թիկունքում մաքուր, հյուրընկալ հայրենիք ունենալ, որպեսզի ավելի վստահ կանգնենք մեր սահմաններին,-ասել է Վահե Վարդանյանը՝ Վայոց ձորի մարզի բնակիչների կողմից շնորհակալություն հայտնելով նախաձեռնող խմբին, աջակցողներին՝ նման ծրագրեր իրականացնելու համար:

«Ազգային միասնություն» շարժման Վայոց ձորի կառույցի ղեկավարն ընդգծել է, որ նախատեսված էր, այս աշխատանքներին ավելի շատ երեխաներ ներգրավել, սակայն, քանի որ քննական շրջան է, աշխատանքներն իրականացնում են 6 հոգի:

Անդրադառնալով իրականացվող աշխատանքների համար տարածքների ընտրությանը՝ Վահե Վարդանյանը նկատել է, որ պատմամշակութային հուշարձաններ շատ են այցելում օտարերկրյա զբոսաշրջիկները և ուխտավորները:

Կարեն Մաթևոսյանն էլ նշել է՝ երբ իմացել է, որ «Ազգային միասնություն» շարժումը Վայոց ձորում աջակցում է նման ծրագրերի իրականացմանը, որոշել է դիմել՝ տարածքների մաքրությունն ապահովելու համար, քանի որ զբոսաշրջային սեզոնն արդեն բացվում է.

-Որոշ ժամանակ առաջ այս համալիների տարածքում էինք ու տեսա, որ այդպիսի աշխատանքի կարիք կա: Դրա համար էլ այս ծրագիրն առաջարկեցի,-ասել է նա:

Մանրամասները՝ Vesti.am-ի տեսանյութում։

Աղբյուրը՝ Vesti.am