Երեկ երեկոյան Տավուշի մարզի Դեբեդ գետն ընկած ավտոմեքենայի վարորդի որոնողափրկարարական աշխատանքները վերսկսել են այսօր առավոտյան ժամը 06.40-ից. մասնակցում է 4 հրշեջ-փրկարար:

Այս մասին տեղեկացնում է ՀՀ արտակարգ իրավիճակների նախարարության կայքը։

Հունիսի 16-ին՝ ժամը 19.34-ին, ԱԻՆ–ում ահազանգ էր ստացվել, որ Տավուշի մարզի Այրում գյուղի կայարանի մոտ ավտոմեքենան ընկել է Դեբեդ գետը. անհրաժեշտ է օգնություն:

Պարզվել էր, որ «ВАЗ-21011» մակնիշի (վարորդ` 1994 թ. ծնված Ա. Մ.) ավտոմեքենան ընկել է գետը:

Փրկարարները գետի երկայնքով (մոտ 7 կմ) իրականացրել էին որոնողափրկարարական աշխատանքներ: Որոնողական աշխատանքներին մասնակցել էին ոստիկանության Նոյեմբերյանի բաժնի աշխատակիցներ և քաղաքացիներ:

Վատ տեսանելիության պատճառով ժամը 21.51-ին աշխատանքները դադարեցվել էին։