ԱԺ ՀՀԿ խմբակցության անդամ Հովհաննես Սահակյանը լրագրողների հետ հանդիպման ժամանակ հայտարարել է, թե ընտրական օրենսգիրքը մեր կյանքում հասարակական հարաբերությունները կարգավորող կարևորագույն փաստաթուղթն է, ուստի պետք է հնարավորինս զերծ լինի թերություններից:

Անդրադառնալով «Ընտրական օրենսգրքում փոփոխություններ և լրացումներ կատարելու մասին» օրինագծին՝ նա նշել է, որ նախագծի այս աշխատանքային տարբերակն արդեն ուղարկվել է Վենետիկի հանձնաժողով' փորձաքննության:

-Մինչև նոյեմբերի 11-ը այս նախագիծը քննարկվելու է: Ընդդիմությունից էլ առաջարկություններ եղել են' մասնավորապես ՀԱԿ-ի կողմից: Առաջարկությունները դեռ չեն քննարկվել: Այս նախագիծը դրված է մեկամսյա քննարկման, կլինեն առաջարկություններ: Հարյուր տոկոսով համամասնականի անցնելու առումով ասեմ, որ կա կարևոր պատճառ: Քաղաքական համակարգը մեզ մոտ այնքան զարգացած չէ, որ միանշանակ լինի համամասնական,-ասել  է Հովհաննես Սահակյանը։

Ըստ նրա՝ չեն բացառվում նաև օրինագծի հանրային լսումները։

-Ցանկանում եմ նշել մի կարևոր հանգամանք ևս: Գիտեք, որ անձնագրերի վրա կնիքներ էին դրվում: Այս օրինագծով մշակվել է մի կարգ, որի համաձայն' մի քանի օր հետո կնիքը անհետանալու է, ինչը կապահովի ընտրության գաղտնիությունը: Ամենակարևոր մի քանի կետերից է նաև ընտրական հանձնաժողովների ձևավորման կարգը: Հիմա այդ հանձնաժողովները ձևավորվում են թիմային սկզբունքով, իսկ այստեղ առաջարկ կա՝ պրոֆեսիոնալների սկզբունքով հանձնաժողովների ձևավորումը,-ասել է Հովհաննես Սահակյանը։

7or.am