–Մեզ մոտ այժմ կարծես նորմերի կոլիզիա կա հին Սահմանադրության և նոր Սահմանադրության կիրառման միջև։ Կիրառողը, իհարկե, ավելի լավ կընկալի՝ արդյոք անցումային այս շրջանում որևէ խնդիր առաջանո՞ւմ է, թե ոչ,– այս մասին հուլիսի 4–ին լրագրողների հետ հանդիպման ընթացքում ասել է «Թրանսփարենսի Ինթերնեշնլ» հակակոռուպցիոն կենտրոնի իրավախորհրդատու Հերիքնազ Տիգրանյանը։

Նա նշել է, որ համաձայն նոր Սահմանադրության՝ ՀՀ–ն գնացել է դեպի պառլամենտական կառավարման համակարգ, որի համար վերջինս դեռևս նախադրյալներ չուներ։

–Մենք չունեինք բազմակուսակցական կայուն զարգացած համակարգ, որը հնարավորություն կտար կուսակցություններին իսկապես մուտք գործել խորհրդարան՝ այդ պառլամենտարիզմի տարրն ապահովելու նպատակով,– նշել է Հերիքնազ Տիգրանյանը։

Նաև հավելել է, որ «կայուն մեծամասնություն» հասկացությունը պառլամենտարիզմի տարրերը մի փոքր աղավաղում է, և դա դասական պառլամենտարիզմի օրինակ չէ։

7or.am