Լրագրողների հետ հանդիպման ժամանակ «Ժառանգություն» խմբակցության ղեկավար Ստեփան Սաֆարյանն ասել է, թե  դժվար կլինի միանշանակ պատասխանել՝ Թուրքիայի խորհրդարանը կվավերացնի՞ հայ-թուրքական արձանագրությունները, թե՞ ոչ։

-Ինքս հակված եմ, որ ձգձգումներով հանդերձ, այնուամենայնիվ, Թուրքիայի խորհրդարանը կվավերացնի այս արձանագրությունները, բայց այս վերջին  շրջանում տեղի ունեցածն ապացուցում է, որ Թուրքիան շատ ավելի շահագրգռված է այս պրոցեսից օգուտներ քաղելով, քան գործընթացի  վերջնակետով, այն է՝ հարաբերությունների կարգավորմամբ,-ասել է նա։

Ըստ Ստեփան Սաֆարյանի՝ այսօր պետք է արձանագրել, որ հայկական կողմի և միջազգային հանրության սխալի հետևանքով մենք գործ ունենք թուրքական շատ հստակ ձևակերպված պայմանի հետ։

-Պայմանը չբավարարելը վտանգում է արձանագրությունների վավերացման գործընթացն ընդհանրապես, քանի որ Հայաստանը նույնպես հասկացնել է տվել, որ արձանագրությունները միակողմանի չեղյալ համարելու քայլերի կգնա։ Իսկ եթե փորձ է արվում բավարարել, պետք է ասել, որ պաշտոնական Երևանն է հայտնվում բավական մեծ ճնշումների տակ՝ Ղարաբաղի հարցով։ Բայց, չնայած այդ ճնշումներին, անգամ տեսանելի չեն ղարաբաղյան խնդրի շուտափույթ լուծման հեռանկարները,-հավելել է նա։

Այն հարցին, թե ի՞նչն է պատճառը, որ միայն հիմա Հայաստանը սկսեց կոշտացնել դիրքորոշումը, նա պատասխանել է, թե ամիսներ առաջ էլ ինքն ասել է, որ ժամանակը ցույց կտա իրականությունը։

-Թուրքիայի հետ հարաբերվելու ամեն օրը ՀՀ իշխանություններին կապացուցի այս արձանագրությունների վավերացման հետ կապված ռիսկերը, և նրանք դա կգիտակցեն անգամ առանց ընդդիմության քննադատության,-ասել է Ստեփան Սաֆարյանը։

7or.am