Արցախյան հիմնախնդրին անդրադառնալով՝ ՀՀ ԱԺ«Ժառանգություն» խմբակցության պատգամավոր Ստյոպա Սաֆարյանը ԱԺ հայտարարությունների ժամին ասել է, որ բանակցությունները ընթանում են երեք տարի շարունակ Ադրբեջանի ու Հայաստանի կողմից ոչ այն է լիարժեք ընդունվող, ոչ այն է մերժվող մադրիդյան առաջարկների հիման վրա և այսպես շարունակվելու դեպքում տանուլ ենք տալու խաղաղությունը, թեպետ հաղթել ենք պատերազմը:

-Տանուլ ենք տալու նախևառաջ այն պատճառով, որ հայկական կողմերի համար անարդար են 16-ամյա բանակցային գործընթացի հիմքում դրված խաղի կանոնները, որոնց արդյունքները բոլորիս հայտնի տարբերակներն են՝ 1997-98թթ. փաթեթայինից ու փուլայինից մինչև 2007թ. փաթեթափուլային մադրիդյան առաջարկներ,-ասել է Ս.Սաֆարյանը։

Նրա խոսքերով՝ այդ խաղի կանոնները հետևյալն են՝

. կողմերը ելակետ են ընդունում Ադրբեջանի տարածքային ամբողջականությունը, վերջինս էլ ճանաչում է Արցախի բնակչության ինքնորոշման իրավունքը, որը պետք է իրականացվի նորից ու միայն Ադրբեջանի համաձայնությամբ

. բանակցություններն ընթանում են ԼՂՀ ներկայացուցիչների բացակայությամբ

. ասվում է, թե մադրիդյան առաջարկները սկզբունքներ են, սակայն, դրանցից միայն երեքն են սկզբունք՝ տարածքային ամբողջականությունը, ժողովուրդների ինքնորոշումը և ուժի կամ դրա սպառնալիքի չկիրառելը:Մյուսները խնդիրներ են, որոնք պետք է լուծվեն հայկական կողմի շահերի հաշվին

. Արցախի միջանկյալ ու անորոշ ապագայում որոշվելիք վերջնական կարգավիճակը, որով փորձ է արվում ետ շրջել Արցախի ներկայիս կարգավիճակը, պայմանագրով ճանաչել, որ նա օրինավոր չի ինքնորոշվել-ապագաղութացել:

-Այսպիսի խաղի կանոններով ընթացող բանակցությունները կամ դրանց արդյունքները կա՛մ տանում են պատերազմի, կա՛մ Հայաստանի ու Արցախի ինքնակապիտուլյացիայի,-ընդգծել է նա և հավելել, որ բանակցությունների տեսության մեջ կա մի աքսիոմատիկ պատվիրան՝ եթե խաղի կանոները ձեռնտու չեն, ապա պետք է փոխես դրանք: Իսկ այսօր խաղի կանոնները փոխել հնարավոր է միայն Հայաստանի կողմից Արցախի անկախության ճանաչումով։

7or.am