«Հանրապետություն» կուսակցության քաղխորհրդի անդամ Սուրեն Սուրենյանցն ասել է, թե ինքը Նիկոլ Փաշինյանի նախընտրական շտաբի անդամ է, և թիվ 10 ընտրատարածքում էլ Փաշինյանը քաղաքական մրցակիցներ չունի։

-Եթե հաշվի առնենք այն հանգամանքը, որ Հմայակ Հովհաննիսյանը հրապարակավ խոստացել է (իսկ ես չեմ ուզում կասկածի տակ դնել պարոն Հովհաննիսյանի խոստումը), որ նա մինչև դեկտեմբերի 31-ը դուրս կգա ընտրարշավից՝ աջակցելով Նիկոլ Փաշինյանին, ապա միակ թեկնածուն Նիկոլ Փաշինյանն է, որը հստակ ձևակերպել  է իր մասնակցության քաղաքական հայտը։ Դա տեսանելի չէ ո՛չ Դավիթ Հակոբյանի մոտ, որն արդեն, ինձ թվում է, խճճվել է իր իսկ սիրած տեսության լաբիրինթոսում, ոչ  էլ...Էլ  չեմ խոսում մյուս ընկերոջ՝ Սիմոնյանի մասին, որն անտեղյակ մարդու, իր կամքից անկախ մի գործընթացի մեջ հայտնվածի տպավորություն է թողնում և իր համար բրենդ է սարքել քաղաքի կենտրոնի տղա լինելու հանգամանքը։ Տպավորություն է, որ մասնակցում է լավ տղու կոնկուրսին,-ասել է նա։

Ըստ Սուրեն Սուրենյանցի՝ եթե ընտրությունները լինեն օրինական, իշխանությունները ճնշումներ չգործադրեն, Նիկոլ Փաշինյանի հաղթանակն անխուսափելի է։

-Սա հրաշալի թեստ է իշխանության համար քաղաքական մշակույթի և այլնի մասին։ Համոզե՛ք, թիվ 10 ընտրատարածքում անցկացրե՛ք նորմալ ընտրություններ, և թող հասարակությունն էլ համոզվի, որ կամք ունեն,-նշել է նա։

Նա ասել է, որ մեր հասարակությունն իր քվեով պիտի գնահատական տա Հայաստանի արդարադատության համակարգին։

 7or.am