–Ռուսաստանաբնակ հայ գործարար, բարերար Լևոն Հայրապետյանին տեղափոխել են Մորդովայի Ինքնավար Հանրապետությունում գտնվող բանտը, որը Ռուսաստանի ամենասարսափելի բանտերից մեկն է: Չնայած նրան, որ նրա առողջական վիճակը հիմա լավ է, միևնույն է, նման բանտային պայմանները նրան հակացուցված են,–այս մասին սեպտեմբերի 10-ին լրագրողների հետ զրույցի ժամանակ ասել է իրավաբան Հայկազ Մակարյանը:

Հայկազ Մակարյանը կոչ է արել ՀՀ իշխանություններին, որպեսզի անգործություն չդրսևորեն, այլ քայլեր ձեռնարկեն իրավիճակը շտկելու նպատակով:

–Լևոն Հայրապետյանը երկքաղաքացիություն ունի, իսկ Հայաստանի և Ռուսաստանի միջև միջպետական մի քանի պայմանագրերում կան կետեր, որ նման դեպքերում արտահանձնումը հնարավոր է, հատկապես մի մարդու դեպքում, ով անգամ Պետական դումայի կողմից մեդալ է ստացել,-հավելել է Մակարյանը:

Ասուլիսի ընթացքում Լևոն Հայրապետյանի դուստրը՝ Զարուհի Հայրապետյանը, ասել է, որ իր հայրը բանտից ազատվելուց հետո վերադառնալու է Արցախ և շարունակելու է իր բարեգործական գործունեությունը։

–Ես հպարտությամբ եմ քայլում այս քաղաքում, որովհետև վստահ եմ, որ հայրս իր գործունեության ընթացքում ամրապնդել է Արցախի և Հայաստանի միասնականության գաղափարը: Չնայած իր ծանր հոգեվիճակին՝ նա միշտ կանգնած է Արցախի կողքին,–ասել է Զարուհի Հովհաննիսյանը։

7or.am