Անվճար  բուժօգնություն, բարեգործական համերգ, բարեգործական այց, մանկապարտեզի, գիշերօթիկ դպրոցի, մանկատան, ծերանոցի, բակային  ճամբարի  հովանավորում, դիմակահանդես, «ուսանողական գարուն», ուխտագնացություն, մրցանակաբաշխություն, «բազեական» հավաքներ, փառատոններ, էլիտար խաղեր, սպորտային  մրցումներ, «սեմինարներ» հանգստյան գոտիներում  և  նման  միջոցառումներ  կազմում  են  ՀՀԿ  հիմնական  գործունեությունը /www.hhk.am/:

Պետական  հսկայական միջոցների  հաշվին  իրականացվող «կուսակցական»    այդ  գործունեությունը, որը  մերթ ընդ մերթ ավարտվում  է կուստոմսերի  հանձմամբ, իրականացվում  է  նաև   բուհերում  և  զորամասերում:

ՀՀԿ-ական  և կոալիցիոն պաշտոնյաները  ոչ  միայն  չեն  կանխում, այլ' իրենց  ծառայողական  դիրքն  անթաքույց օգտագործում  են  հօգուտ  կուսակցական  շահերի' այս  աննախադեպ  զանգվածային  խախտումների  նախաձեռնման  և  իրականացման  գործում, մասնավորապես' ՀՀ վարչապետը, Նախագահի  աշխատակազմի  ղեկավարը, Երևանի  քաղաքապետը, նախարարներ, մարզպետներ, ռեկտորներ:

Բանը  հասել  է  նաև  նրան, որ  Պաշտպանության  նախարարը  նորից  ներգրավվում է    ՀՀԿ  գործունեության  մեջ: Հիշենք  նաև, Սահմանադրական  դատարանի  նախագահի  մասնակցությունը  ՀՀԿ  արտաքին  քաղաքականության  քարոզչության  գործում:

Այսինքն, պետական  հնարավոր  ներուժն  այսօր    ուղղված  է  ՀՀԿ  նախընտրական  հզորացմանը, որի  անվերահսկելիության համար, կարծես, շատ  հարմար  պայմաններ  են  ստեղծել'

1. Քաղաքական  ուժերի  մի  մասին  զբաղեցրել  են  մարտիմեկյան  հետևանքների  վերացման  անարդյունք  գործով, մյուսին' հայ-թուրքական  հարաբերությունների  մասին  անպտուղ  խոսակցություններով, երրորդին'ընտրական  օրենսգրքի  հերթական "հուսադրող" նախագծով,    
2. իսկ  ժողովուրդը  տառապում  է  օրեցօր  աճող  գներից  և  այլն:

ՀՀԿ  ապօրինությունների  սանձահարման համար, հրատապ  անհրաժեշտություն  է  դարձել  միջոցներ  ձեռնարկել, որ միջազգային  կառույցները'

1. պահանջեն Ս.Սարգսյանի  հեռացումը  ՀՀԿ  ղեկավարի  համատեղման պաշտոնից, որի  օրինակն  արդեն  իրականացվել  է  Եվրոպայում, 
2. ՀՀԿ  ներկա  գործունեությանը  տան փորձագիտական  գնահատական, որի  արդյունքում պետական այդ  բարեգործական  կազմակերպությունն  իրավունք  չի  ունենա մասնակցել  առաջիկա ընտրություններին: 

Այս  նպատակով, սույն  հայտարարությունը  ներկայացնում  ենք  ԵՄ, ԵԽ, ԵԱՀԿ  հայաստանյան գրասենյակներին  և  այդ   կառույցների անդամ-երկրների  դեսպանատներին, իսկ  դեկտեմբեր  ամսին  «Ընդդեմ  ՀՀԿ  ապօրինությունների»  համահայկական  կազմակերպության  շրջանակներում  կկազմակերպվի  համացանցային  քննարկում:

Հայաստանի Պառլամենտարիզմի Կենտրոն /ՀՊԱԿ/                                                                     

նախագահ' Ռ. Թորոսյան