Ի պատասխան լրատվամիջոցների հարցումների՝ եւս մեկ անգամ տեղեկացնում ենք, որ իրականությանը չեն համապատասխանում մամուլի այն հրապարակումները, թե  ԱՄՆ հետաքննությունների դաշնային բյուրոյի 8 աշխատակից է ժամանել Հայաստան: ԱՄՆ իրավապահ մարմինների կողմից բանկային եւ բժշկական ապահովագրության ոլորտում բացահայտված զեղծարարությունների քրեական գործով ԱՄՆ Հետաքննությունների դաշնային բյուրոյի որեւէ գործակալ Հայաստան չի ժամանել:

Հայկական մամուլում տպագրված այդօրինակ լուրերի անհեթեթության մասին փաստել էր ԱՄՆ Հետաքննության դաշնային բյուրոյի իրավական հարցերով կցորդ Քեվին Դոնովանը՝  ՀՀ գլխավոր դատախազի հետ դեռեւս հոկտեմբերի 21-ին տեղի ունեցած հանդիպման ժամանակ՝ հայտարարելով, որ  ՀԴԲ-ի որեւէ աշխատակից Հայաստան չի ժամանել: Ինչ վերաբերում է Ք.Դոնովանին, ապա հարկ ենք համարում պարզաբանել, որ Ք.Դոնովանը  տարածաշրջանում ԱՄՆ հետաքննությունների դաշնային բյուրոյի ներկայացուցիչն է եւ նրա հիմնական նստավայրը Թբիլիսին է:

Հանդիպման ընթացքում Ք.Դոնովանը  շնորհակալություն է հայտնել ցուցաբերված համագործակցության պատրաստակամության համար եւ նշել, որ քրեական գործով անհրաժեշտություն առաջանալու դեպքում ԱՄՆ-ն կդիմի իրավական փոխօգնության խնդրանքով:  Առ այս պահը Հայաստանի իրավապահ մարմինները չեն ստացել իրավական փոխօգնության խնդրանք, հետեւապես մամուլի այն հրապարակումները, թե ՀԴԲ-ի աշխատակիցներ են Հայաստան ժամանել եւ սկսել իրականացնել ինչ-ինչ ստուգումները՝ ընդամենը հերյուրանքներ են, երեւակայության արգասիք:

Որեւէ երկրի իրավապահ մարմնի աշխատակից չի կարող որեւէ այլ երկրի տարածքում իրականացնել որեւէ քննչական գործողություն՝ առանց տվյալ երկրի իրավապահ մարմինների նախնական համաձայնությունը ստանալու:  Հայաստանի եւ ԱՄՆ-ի իրավապահները նախկինում եւս համագործակցել են կոնկրետ քրեական գործերով միմյանց ցուցաբերելով իրակավան օգնություն:  Եվ դիտարկվող քրեական գործը բացառություն չէ. Կլինի իրավական փոխօգնության հարցում՝ դատախազությունն իր լիազորությունների շրջանակներում կաջակցի: Առ այս պահը նման խնդրանք չի ստացվել:

ՀՀ գլխավոր դատախազության
մամուլի ծառայություն