Նոյեմբերի 10-ին Սիրիայում Հայաստանի դեսպան Արշակ Փոլադյանը հանդիպում է ունեցել Սիրիայի գյուղատնտեսության նախարար դոկտոր Ադել Սաֆարի հետ:

Հանդիպման ընթացքում քննարկվել են գյուղատնտեսության բնագավառում հայ-սիրիական համագործակցության արդի վիճակը եւ զարգացման հեռանկարները:

Կողմերն անդրադարձել են երկու երկրների միջեւ գյուղատնտեսության եւ անասնաբուժության, անասնաբուժական պատվաստուկների արտադրության ոլորտներում առկա ներուժին ու հնարավորություններին եւ կարեւորել դրանց զարգացումը:

Կողմերը քննարկել են նաեւ 2010թ. Դամասկոսում ստորագրված Գործնական ծրագրի դրույթների իրականացման հնարավորություններն ու համագործակցության զարգացման ուղիները:

Նախնական պայմանավորվածություն է ձեռք բերվել սիրիական ցորենի բարձրորակ տեսակների' փորձարարական նպատակով Հայաստանի գիտահետազոտական հիմնարկներում աճեցման վերաբերյալ:

Դոկտոր Ադել Սաֆարն ընդգծել է, որ հրավերի դեպքում կայցելի Հայաստան համագործակցության զարգացման հեռանկարները տեղում ուսումնասիրելու համար: