«New Yorker»–ի փոխանցմամբ՝ ամերիկացի մի խումբ սենատորներ նամակ են գրել երկրի գլխավոր դատախազին, ֆինանսների նախարարին եւ ՀԴԲ-ի տնօրենին՝ խնդրելով հետաքննել Ադրբեջանի մայրաքաղաք Բաքվում ԱՄՆ նախագահի «Trump Organization» ընկերության գործունեությունը՝ կոռուպցիոն խախտումների եւ «Իրանական հեղափոխության պահապանների» զորակազմի հետ կապերի կասկածանքով:

Նամակը ստորագրել են սենատորներ Շերոդ Բրաունը, Դայեն Ֆայնսթայնը եւ Բեն Քարդինը։ Այս մասին փոխանցում է ՌԻԱ «Նովոստին»։

Հեղինակները պահանջում են ստուգել ընկերության կողմից Բաքվում հյուրանոցի կառուցմանը վերաբերող նյութը, որը «New Yorker»–ում է հրապարակվել մարտ ամսվա կեսերին:

Հոդվածում պնդվում է, որ Թրամփի ընկերության գործնկերներն են եղել Անար եւ Էլթոն Մամեդովները՝ տրանսպորտի նախարարության ղեկավարի ազգականները: Էլթոն Մամեդովը նաեւ խորհրդարանի պատգամավոր է: Ըստ լրագրողների՝ դա նշանակում է, որ Թրամփի ընկերությունը խախտել է ամերիկյան օրենսդրությունը, որն արգելում Է որեւիցե շահի տրամադրումն օտարերկրյա իշխանությունների ներկայացուցիչներին՝ պատասխան արտոնությունների ակնկալիքով։

7or.am