Ռուսաստանը դադարեցնում է Սիրիայում գործողությունների ընթացքում միջադեպերի կանխարգելման և օդուժի թռիչքների անվտանգության ապահովման հուշագրի գործողությունը, որը կնքել էր ԱՄՆ-ի հետ: Այդ մասին հրապարակված է Ռուսաստանի արտաքին քաղաքական գերատեսչության պաշտոնական էջում։

Մոսկվան նաև ՄԱԿ-ի Անվտանգության խորհրդին կոչ է անում արտակարգ նիստ անցկացնել Սիրիայում ստեղծված իրավիճակը քննարկելու համար:

Հիշեցնենք՝ ապրիլի 6–ի երեկոյան ԱՄՆ-ը հրթիռակոծել էր Սիրիայի կառավարական ուժերի ավիաբազան: Ըստ ՌԴ ԱԳՆ–ի՝ ամերիկյան թևավոր հրթիռներով հարվածն ավելի վաղ էր նախապատրաստվել, քան Սիրիայի Իդլիբ նահանգում տեղի ունեցած քիմիական հարձակումը, որը «պարզապես օգտագործվեց որպես պատրվակ ուժի ցուցադրման համար»:

Այդկերպ ԱՄՆ–ը, ՌԴ ԱԳՆ–ի կարծիքով, փորձում է միջազգային հանրության ուշադրությունը շեղել Մոսուլում տիրող իրավիճակից, որտեղ նաև ամերիկյան կոալիցիայի գործողությունների հետևանքով հարյուրավոր խաղաղ բնակիչներ են զոհվել։

Ռուսաստանը կատարվածն «ինքնիշխան Սիրիայի դեմ բացահայտ ագրեսիայի ակտ» է որակել։

«Ամերիկյան կողմը չի կարող չհասկանալ, որ սիրիական կառավարական զորքերն այնտեղ քիմիական զենք չեն կիրառել... Դամասկոսը քիմիական զենք պարզապես չունի, ինչը մեկ անգամ չէ, որ հաստատվել է որակյալ մասնագետների կողմից», - ասված է հայտարարությունում:

Ավելի վաղ ՌԴ նախագահի խոսնակ Դմիտրի Պեսկովը հայտնել էր, որ Պուտինի կարծիքով ԱՄՆ ԶՈւ գործողությունները շոշափելի վնաս կհասցնեն ռուս–ամերիկյան հարաբերություններին, որոնք առանց այդ էլ ողբալի վիճակում են։

7or.am