Թուրքիայում հայ լրագրող, «Ակոս» թերթի խմբագրապետ Հրանտ Դինքի սպանության գործով դատավարության շրջանակներում կազմված մեղադրական եզրակացության մեջ 51 մեղադրյալների շարքերում տեղ է գտել նաև Էրդողանի քաղաքական հակառակորդ, ընդդիմադիր գյուլենական շարժման առաջնորդ և իսլամի հայտնի քարոզիչ Ֆեթթուլլահ Գյուլենի անունը:

Ինչպես հայտնում է «ermenihaber.am»–ը՝ «Միլլիյեթ»–ին հղումով, Ստամբուլի գլխավոր դատախազության, ահաբեկչության և կազմակերպված հանցագործությունների վարչության դատախազ Գյոքալփ Քյոթչուի կողմից տարվող հետաքննության արդյունքում կազմվել է 122–էջանոց մեղադրական եզրակացություն, որը ներառում է 51 կասկածյալ, 28 ձերբակալված և 8 որոնման մեջ գտնվող անձանց անուններ:

Ուշագրավ է, որ Դինքի սպանության մասնակցության մեջ մեղադրվում են գյուլենական համայնքի անդամներ և անձամբ համայնքի ղեկավար Ֆեթթուլլահ Գյուլենը:

Ըստ աղբյուրի՝ մեղադրյալների շարքում են նաև նախկին դատախազ Զեքերյա Օզը, փակված «Զաման» պարբերականի խմբագիր Էքրեմ Դումնլըն, լրագրողներ Ադեմ Յավուզ Արսլանը, Էրջան Գյունը, նախկին գնտապետ Համզա Ջելեփօղլուն, Տրապիզոնի ժանդարմերիայի հետախուզության բաժնի պետ Մեթին Յըլդըզը, Ստամբուլի ժանդամերիայի հեզախուզության բաժնի աշխատակից Մուհարրեմ Դեմիրքալեն և այլք:

Աղբյուրը հիշեցնում է՝ Հրանտ Դինքը սպանվել է Ստամբուլում գտնվող «Ակոս» թերթի խմբագրության դիմաց՝2007 թվականի հունվարի 19-ին: Նրա սպանության գործով դատը Թուրքիայի ամենաաղմկահարույց դատական գործերից մեկն է, որ շարունակվում է արդեն 9 տարի: