Ռուսաստանի և Եվրամիության հարաբերությունները պետք է վերականգնվեն։ «Аdevarul.ro»–ի հետ զրույցում նման հայտարարություն է արել Եվրահանձնաժողովի ղեկավար Ժան-Քլոդ Յունքերը։

«Ճիշտ է, որ Ռուսաստանի հետ մեր հարաբերություններն արդեն այնպիսին չեն, ինչպիսին եղել են, և այնպիսին չեն, ինչպիսին մենք կցանկանայինք։ Սակայն եթե անգամ ներկայում մեր հարաբերություններում կան խնդիրներ, դա չի նշանակում, որ դրանք կործանված են։ Մենք պետք է վերականգնենք դրանք, և կարծում եմ՝ մենք կկարողանանք դա անել»,-նշել է Յունքերը։

Եվրահանձնաժողովի ղեկավարը նկատել է, որ տարաձայնությունները վերաբերում են Ուկրաինայի խնդրին և Ղրիմի «անօրինական բռնակցմանը»։

«Այդուհանդերձ, հաղորդակցության մեր ուղիները պետք է բաց մնան։ Այսօր աշխարհը, անկասկած, համագործակցության կարիք ունի, այլ ոչ թե առճակատման՝ տնտեսության ու անվտանգության տեսանկյունից, ինչպես նաև աշխարհաքաղաքական հեռանկարում»,-ընդգծել է եվրոպացի գործիչը։

7or.am