ՀՀԿ խմբակցության ղեկավար Գալուստ Սահակյանը, «7օր»-ի հարցին ի պատասխան, դրական է գնահատել ՀՀ վարչապետ Տիգրան Սարգսյանի կողմից անհատական բլոգ բացելու քայլը՝ ասելով, որ այդպիսիով նա օրենք չի խախտել։

-Դա շատ լավ բան է։ Կարող է այդ ճանապարհով էլ շփվել թե՛ քաղաքական ուժերի, թե՛ քաղաքացիների հետ։ Դա ընդունված բան է,- ասել է Գ. Սահակյանը։

Վարչապետի բլոգում քննադատությունների ի հայտ գալու հնարավորության մասին խոսելիս էլ ՀՀԿ խմբակցության ղեկավարը նշել է.

-Քննադատությունից չի կարելի վախենալ։ Եթե այդ կայքէջը չլինի, քննադատությունը չկա՞։ Ավելի լավ՝ կքննադատեն, ով կքննադատի, պատասխանը կստանա։

Հաշվի առնելով այն փաստը, որ Տիգրան Սարգսյանի հանրապետական դառնալուց հետո մի քանի նախարարներ նույնպես հանրապետական դարձան՝ «7օր»-ի թղթակիցը Գ. Սահակյանից հետաքրքրվել է՝ հնարավո՞ր է, որ անհատական բլոգ ունենալու օրինակը ևս վարակիչ դառնա, և մյուս նախարարներին նույնպես հրահանգվի հետևել այդ քայլին։

-Հրահանգվելու խնդիր չկա։ Ցանկացած անձ կարող է իր համար կայքէջ բացել և հանգիստ օգտագործել դա,- պատասխանել է նա։

7or.am