Տարածվող լուրերը, թե «Նաիրիտ Գործարան» ՓԲԸ աշխատակիցների աշխատավարձերի չվճարման հետ կապված բողոքի ցույցից հետո ընկերության ղեկավարության կողմից պահանջվել են ցույցի մասնակիցների ցուցակները' վերջիններիս պատժելու նպատակով, ստահոդ են և սադրիչ:

Վերջին երեք տարիների ընթացքում նաիրիտցիները կազմակերպել են բողոքի մի քանի ցույց, սակայն որևէ մեկը չի կարող հաստատել կամ վկայել, թե դրա արդյունքում աշխատակիցներից նույնիսկ մեկի նկատմամբ դրսևորվել է վատ վերաբերմունք, եղել են վարչական տույժեր կամ նսեմացնող գործողություն:

Մասնակիցների ցուցակներն, այո, ճշտվում են պարզ հաշվառում անցկացնելու նպատակով. չէ՞ որ ցույցի մասնակիցների թվում էին նաև նրանք, ովքեր այդ պահին լքել էին իրենց աշխատատեղերը:

Մենք ևս մեկ անգամ խնդրում ենք ձեռնպահ մնալ չստուգված և չհիմնավորված տեղեկատվության տարածումից:

«Նաիրիտ Գործարան» ՓԲԸ

հասարակայնության և ԶԼՄ-ների

հետ կապերի ծառայություն