ԱԺ «Ժառանգություն» խմբակցությունը հաղորդում է այսօր մեկնարկած ԵԽԽՎ լիագումար նստաշրջանում հայկական պատվիրակության մանդատների չհաստատվելու հարցը «Ընթացակարգերի, իմունիտետների և ինստիտուցիոնալ հարցերի» հանձնաժողով փոխանցելու որոշման որոշ մանրամասներ:

«Հայկական պատվիրակության մանդատները վիճարկվել են ԵԽԽՎ-ում ամենամեծ կուսակցության' Եվրոպայի ժողովրդական կուսակցության-EPP բյուրոյի կողմից: Մանդատների կասեցման պատճառը ՀՀ ԱԺ ղեկավարության կողմից իրականացված ձեռնածությունների արդյունքում խորհրդարանական ընդդիմադիր կուսակցության' «Ժառանգության» ներկայացուցչին ապօրինաբար պատվիրակության մշտական կազմից հեռացնելու եւ տիկ. Փոստանջյանի մասնակցությունը ԵԽԽՎ նիստին արգելափակելու գործողություններն են։ Տիկ. Փոստանջյանը Ստրասբուրգ է մեկնել EPP-ի միջամտությունից հետո' Ստրասբուրգից կատարված անմիջական ֆինանսավորմամբ:

Այսօր' ավելի ուշ, հարցը լսվելու է «Ընթացակարգերի, իմունիտետների եւ ինստիտուցիոնալ հարցերի» հանձնաժողովում: Ավելի ուշ կտրվեն նոր մանրամասներ»,-ասված է «Ժառանգություն» կուսակցության տարածած մամլո հաղորդագրության մեջ։