ԱՄՆ-ի Հետաքննությունների դաշնային բյուրոյի աշխատակիցները խուզարկում են անցկացրել անցած ամիս ԱՄՆ-ի նախագահ Դոնալդ Թրամփի քարոզարշավի նախկին ղեկավար Մանաֆորթի տանը` Ռուսաստանի կողմից ամերիկյան ընտրություններում ներգրավված լինելու գործի շրջանակում: Այս մասին հայտնում է Ամերիկայի Ձայնը։

Խուզարկումը անցկացվել է այն բանից հետո, երբ Մանաֆորթը կամովին հանդիպել է Սենատի հատուկ ծառայությունների գծով հանձնաժողովի հետ, որը հետաքննում է նախագահ Թրամփի նախընտրական թիմի անդամների և Ռուսաստանի միջև հնարավոր համագործակցության մասին գոծը:

Մանաֆորթը երկար տարիներ ներկայացնում է Հանրապետական կուսակցությունը, սակայն սերտ ֆինանսական կապեր ունի Ռուսաստանի և Ուկրաինայի հետ:

Խուզարկումն անցկացվել է հատուկ հետաքննող Ռոբերտ Մյուլերի վարույթի ներքո գտնվող գործի շրջանակում, որը փորձում է պարզել՝ արդյոք Թրամփի նախընտրական թիմը համագործակցել է Մոսկվայի հետ՝ փորձելով ազդել ընտրությունների արդյունքների վրա:

Նախագահ Թրամփը պաշտոնից հեռացրել էր Հետաքննությունների դաշնային բյուրոյի նախկին ղեկավար Ջեյմս Քոմիին, ով ղեկավարում էր ընտրույուններում Ռուսաստանի ներգրավված լինելու հարցի հետ կապված հետաքննությունը: Նախագահը քննադատել է հետաքննությունը՝ այն անվանելով «վհուկների որս»: