Միջազգային մամուլի միջոցներն այսօր գլխավոր լուրերի իրենց բաժիններում անդրդադառնում են Հայաստանի վարչապետ Սերժ Սարգսյանի հրաժարականին, նրան այդ քայլին դրդող համաժողովրդական շարժմանն ու շարժման հաղթանակին:

ԲիԲիՍի-ն մեջբերում է Սարգսյանի խոսնակ Հովհաննես Նիկողոսյանի հետեւյալ խոսքերը. «Կարծում եմ՝ նրա հրաժարականը ժողովրդավարության հստակ ցուցադրում է: Աշխարհի ոչ բոլոր անկյուններում սկսված ցույցերն են կարողանում հասնել իշխանությունների հրաժարականին»:

ԲիԲիՍի-ն հիշեցնում է, որ Սարգսյանը քննադատության էր ենթարկվում Ռուսաստանի նախագահի հետ սերտ հարաբերությունների համար:

Բրիտանական կայանը մեջբերում է նաեւ հանրահավաքի մասնակից ցուցարարների խոսքերը. «Սա հենց այն է, ինչ հասկանում ենք հաղթանակ ասելով», «Սա իրապես օր է, որը պետք է զգանք բոլորս, սա օր է, երբ բոլորս պիտի լինենք այստեղ` ականատես լինելու պատմության այս էջին»:

Ըստ ԲիԲիՍի-ի, Սերժ Սարգսյանի հրաժարականի հայտարարությունը «ուրախության հրավառություն էր, որը պայթեց հրապարակում»:

«Շատերն են Հայաստանում ասում, որ սա հաղթանակ է ամբողջ ժողովրդի համար, ժողովուրդ, որը մեկ օր անց նշում է Հայոց ցեղասպանության տարելիցը»:

Գարդիըն պարբերականը գրում է, որ ցույցերը Հայաստանում եռում էին արդեն մեկ շաբաթ, սակայն այդ օրերին փողոցներում լցված ոստիկանները երկուշաբթի օրը բացակայում էին տեսադաշտից:

Պարբերականը հիշեցնում է, որ Հայաստանում Սարգսյանի դեմ ընդդիմությունը նրան մեղադրում էր նաեւ Ադրբեջանի ու Թուրքիայի հետ շարունակվող լարվածությունը մեղմել չկարողանալու մեջ:

ՍիԷնԷն կայանը, պարզապես տեղեկություններ տալով Հայաստանում զարգացող ու տեղի ունեցած իրադարձությունների մասին, իր ընթերցողներին պատմում է Սերժ Սարգսյանի անցած ու քաղաքականապես ավարտված ուղու մասին:

ԱյՋազիրա-ն գրում է. «Սարգսյանի հայտարարությունը չի նշում, թե երբ է ինքը թողնում պաշտոնը»: Իսկ գործակալության թղթակցի խոսքերով, «Այս շարժումը ցույց տվեց, թե որքան են Հայաստանում մարդիկ հասկացել, որ իրենք ունեցել են համակարգում փոփոխություն իրականացնելու ուժ, համակարգ, որը հայտնի է իր կոռուպցիայի բարձր մակարդակով»:

Ռոյթըրզ լրատվականն իր ընթերցողներին պատմում է ցուցարարների հետ մոտ 200 զինվորականների կողմից միասնության փաստի մասին, այն մասին, որ նրանք ողջագուրվում էին ցուցարարների հետ ու ծածանում երկրի պետական դրոշները: «Պաշտպանության նախարարությունը դատապարտել է զինվորականների այս քայլը՝ այն անվանելով անօրինական ու հայտարարել, որ նրանք կենթարկվեն ամենախիստ պատիժների»:

Ռոյթըրզի համաձայն, զինվորականները եղել են ռազմական խաղաղապահների գումարտակի անդամներ:

Նյու Յորք Թայմս-ը եւ Վաշինգթոն Փոսթ-ը հիշեցնում են, որ նախագահի պաշտոնավարման ժամկետը լրանալու պատճառով վարչապետի պաշտոնը զբաղեցնելու օրինակը Սերժ Սարգսյանը վերցրել էր Ռուսաստանի նախագահ Վլադիմիր Պուտինից, որը 2008-ին ստանձնել էր վարչապետի պաշտոնը եւ նախագահի պաշտոնը նորից զբաղեցրել 2012-ին:

Հայաստանում տեղի ունեցած իրադարձություններին են անդրադարձել նաեւ ԷյԲիՍի, Բլումբերգ, Նյուզուիք, Յուրոնյուզ եւ աշխարհի մի շարք այլ հանրահայտ թերթեր, հեռուստատեսային ու ռադիոկայաններ, լրավական այլ ծառայություններ:

Աղբյուրը՝ Ամերիկայի ձայն