Վրաստանի նախագահի թեկնածու, «Գիրչի» (թարգմ․՝ կոն) կուսակցության ղեկավար Զուրաբ Ջափարիձեն ծրագրում է հուլիսի 13-ին Թբիլիսիի քաղաքային դատարան տանել կենդանի ջայլամ:

Կուսակցությունը գրավոր նամակով դիմել է Թբիլիսիի կենդանաբանական այգուն՝ խնդրելով հուլիսի 13-ին մի քանի ժամով բաց թողնել ջայլամին: Ջափարիձեի կարծիքով, ջայլամը մարմնավորում է դատարանի դիրքորոշումը:

«Գիրչի»-ում կարծում են, որ Վրաստանում դատարան գոյություն չունի, իսկ ընդհանուր դատական համակարգը նման է ջայլամի, որը գլուխը թաքցնում է հողի մեջ: Խնդրում ենք հուլիսի 13-ին մեզ փոխանցել ջայլամին, նրան տեղափոխելու մասին մենք կհոգանք»,-ասված է նամակում, որը ստորագրել է կուսակցության նախագահ Իագո Խվիչիան:

Ջափարիձեն այսօր կենդանաբանական այգի է այցելել, լուսանկարվել թռչունների հետ, որոնք ըստ նրա ջայլամներ են: Կենդանաբանական այգու տնօրեն Զուրաբ Գուրիելիձեն լրագրողների հետ ճեպազրույցում նշել է, որ այնտեղ ջայլամ չկա, նշված թռչունը էմու է՝ Ավստրալիայում տարածված տեսակ, որը բավականին ագրեսիվ է:

«Ամեն դեպքում թռչունին վանդակից թեկուզ մի քանի ժամով հանելը բացառվում է: Տեղափոխությունը մեծ սթրեսի կենթարկի կենդանուն, իսկ կենդանաբանական այգին պաշտպանում է կենդանիներին»,-հայտարարել է Գուրիելիձեն: Վերջինս «Գիրչիի» անդամներին խորհուրդ է տվել այլ ուղիներ փնտրել:

Հիշեցնենք, Ջափարիձն ձերբակալվել է մայիսի 12-ին Ռուսթավեիլի պողոտայում մի քանի օր տևող բողոքի ակցիաների ժամանակ: Նա մեղադրվում է Վրաստանի վարչական օրենսգրքի 173-րդ հոդվածը խախտելու մեջ, ինչը ենթադրում է ոստիկանության աշխատակիցների հանդեպ անհնազանդություն ցուցաբերել: Ջափարիձեն ժխտում է մեղադրանքը, թեև դեպքերը տեղի են ունեցել տեսախցիկների առջև:

Աղբյուրը՝ aliq.ge