Հաջորդ տարվա բյուջեում աշխատավարձերի և թոշակների բարձրացման որոշում դեռևս չկա:

«Արմենպրես»-ի փոխանցմամբ՝ լրագրողների հետ ճեպազրույցում ՀՀ ֆինանսների նախարար Ատոմ Ջանջուղազյանը նկատեց, որ վերջերս հաստատված միջնաժամկետ ծախսերի ծրագրի քննարկվող տարբերակում առայժմ չի նախատեսվում բարձրացում: Նա խորհուրդ տվեց ծանոթանալ միջնաժամկետ ծախսերի ծրագրին, որում ամրագրված են 2019-ին կանխատեսվող հիմնական ցուցանիշները: «Ես առաջարկում եմ ուսումնասիրել փաստաթղթերը»,-ասաց Ատոմ Ջանջուղազյանը՝ ի պատասխան «սոցիալական ծախսերն ավելանալո՞ւ են, թե ոչ» ճշտող հարցին:

Ինչ վերաբերում է պաշտպանության ոլորտի ծախսերի ավելացմանը, ապա Ֆինանսների նախարարը նշեց, որ դա տրամաբանական ավելացում է՝ կապված ՀՆԱ-ի հետ: «Ինչպես սովորաբար նախատեսվում է, հենց այդ տրամաբանությամբ էլ անվանական մեծությամբ թվերն ավելանում են պաշտպանական ոլորտում: Այն կախվածության մեջ է ՀՆԱ-ից»,-հավելեց նա: