Երեկ ելույթ ունենալով խորհրդարանում՝ ՀՀԿ խմբակցության պատգամավոր, ԺԱԿ կուսակցության նախագահ Սպարտակ Մելիքյանը հայտարարել է, թե Վերահսկիչ պալատն «Անանիա Շիրակացու» անվան միջազգային հարաբերությունների համալսարանում կատարած ստուգումների պարագայում խեղաթյուրել է իրականությունը և վարկաբեկել համալսարանի բարի համբավն ու հեղինակությունը։ Նրա խոսքերով՝ «Անանիա Շիրակացի» համալսարանն արժանացել է խիստ քննադատության միայն այն պատճառով, որ հրաժարվել է բավարարել ստուգող խմբի ղեկավարի պահանջը՝«սև ցուցակում» չհայտնվելու համար տալ 4000 դոլար կաշառք, ինչն էլ համաձայնեցված է եղել Իշխան Զաքարյանի հետ:

-Պարոն Զաքարյանի քննադատությունն էլ այդ սպառնալիքի հետևանքն է,-հայտարարել է Ս. Մելիքյանը՝ վստահություն հայտնելով, որ իր այս ահազանգին գործնականորեն կարձագանքեն և՛ ՀՀ Գլխավոր դատախազությունում, և՛ ԱԱԾ-ում:

«7օր»-ի տեղեկություններով՝ «Անանիա Շիրակացու» անվան համալսարանը պատկանում է հենց Սպարտակ Մելիքյանին։

-«Անանիա Շիրակացու» անվան համալսարանը պատկանում է ինձ,-մեզ հետ զրույցում հաստատել է Ս. Մելիքյանը՝ ավելացնելով,-Իշխան Զաքարյանն այդ քննադատություններն արել է սրանից մոտ մեկ շաբաթ առաջ, և մենք որևէ կերպ չենք էլ ցանկացել դրան անդրադառնալ։ Բայց քանի որ երեկ հաշվետվության ժամանակ ինքը մեղադրում էր ամբողջ պետական ապարատին, կարելի է ասել՝ բոլոր նախարարներին, բոլոր համայնքապետերին՝ գողության, յուրացման մեջ, ես էլ ամեն ինչը տեղը դրեցի՝ ասացի, որ կոռուպցիան գալիս է ձեզանի՛ց։  

Սպարտակ Մելիքյանի հետ «7օր»-ի հարցազրույցին կարող եք ծանոթանալ քիչ ավելի ուշ։

Ի դեպ, ՎՊ մամուլի պատասխանատուն էլ ասել է, որ այսօր խորհրդարանում Իշխան Զաքարյանը հանդես կգա պատասխան հայտարարությամբ։

7or.am