Հայաստան ՌԴ նախագահ Վլադիմիր Պուտինի այցը քննարկվում է, սակայն քիչ հավանական է, որ այն կայանա մինչև այս տարեվերջ։ Հետևաբար արժե կենտրոնանալ 2019 թվականի վրա։ РИА Новости-ի փոխանցմամբ, այս մասին հայտնել է ՌԴ նախագահի օգնական Յուրի Ուշակովը։

«Իրոք քննարկվում է մեր նախագահի այցի հնարավորությունը Հայաստան, սակայն կոնկրետ ժամկետներ դեռ չեն քննարկվում»,-ասել է Ուշակովը ճեպազրույցի ժամանակ։

«Ենթադրվում է, որ նրանք, ամենայն հավանականությամբ, դեռ կհանդիպեն ոչ միայն Դուշանբեում (ԱՊՀ-ի գագաթաժողովում), այլև Աստանայում կայանալիք ՀԱՊԿ-ի նստաշրջանում։ Դա մեկ։ Եվ դեկտեմբերին Մոսկվայում ծրագրվում է Եվրասիական տնտեսական միության գագաթաժողովը, ինչը նույնպես փոխադարձ շփման հնարավորություն է ընձեռում առաջնորդներին, ծայրահեղ դեպքում՝ կարճատև։ Հայաստան այցի հարցը կամ որևէ ժամկետ դեռ չի քննարկվում։ Կարծում եմ, որ, թերևս, այցի առումով արժե կենտրոնանալ հաջորդ տարվա վրա»,-հավելել է նա։

Ուշակովը հիշեցրել է, որ Պուտինի ու Փաշինյանի վերջին հանդիպումը վերջերս է տեղի ունեցել։

«Այս տարի նրանք արդեն 3 անգամ հանդիպել են, բավականին մանրակրկիտ քննարկումներ են եղել։ Մասնավորապես վերջին անգամ նախագահն ու վարչապետը երկուսով զրուցել են շուրջ 3 ժամ, իրոք լավ և մանրակրկիտ զրուցել են»,-ընդգծել է ՌԴ նախագահի օգնականը։

Հիշեցնենք, այսօր ՀՀ ԱԳՆ մամուլի խոսնակ Տիգրան Բալայանը հայտնել էր, որ ՌԴ նախագահ Վլադիմիր Պուտինն առաջիկայում պաշտոնական այցով կժամանի Հայաստան:

«Ռուսաստանի նախագահի այցի վերաբերյալ քննարկումները շարունակվում են, ժամկետներ հստակեցված չեն: Միայն կարող եմ ասել, որ և՛ ռուսական կողմը, և՛ մենք հաստատել ենք, որ առաջիկայում նման այցելություն ծրագրված է, որն ունենալու է պաշտոնական այցելության բնույթ»,-ասել էր Բալայանը:

Նշենք նաև, որ ինչպես տեղեկացնում են Կրեմլի մամուլի ծառայությունից, սեպտեմբերի 27-ին ՌԴ նախագահ Վլադիմիր Պուտինը կարճատև աշխատանքային այց կկատարի Բաքու, որտեղ բանակցություններ կվարի Ադրբեջանի նախագահ Իլհամ Ալիևի հետ։

7or.am