-Երեկվա որոշումը մեր բոլոր հարցերի լուծումը չէ, բայց սա ամերիկյան քաղաքական դաշտում հայկական և թուրքական քաղաքական ուժերի ցուցադրության այն հետագա հանգրվանն էր, որտեղ բավական դժվարությամբ հայկական կողմը հաղթե՛ց,- «Ուրբաթ» ակումբում լրագրողներին ասաց ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը։

Նա նշեց, որ ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի ընդունած բանաձևը ճնշում չէ Թուրքիայի վրա, որ վերջինը վավերացնի հայ-թուրքական արձանագրությունները, բայց ճնշում է, որպեսզի Թուրքիան ավելի լուրջ վերաբերվի Հայաստանի հետ բոլոր բանակցություններում ընդհանրապես, և թուրքական կողմի անպատկառ կեցվածքը զսպվի։

-Պարզ է, որ Թուրքիան չի՛ վավերացնելու արձանագրությունները։ Նա այս և նման բանաձևերը պարզապես որպես պատրվակ կարող է օգտագործել, և սա մեկ անգամ ևս առիթ է, որ Հայաստանն ասի, որ Թուրքիայի պատճառով տապալվել է այս արձանագրությունների վավերացման գործընթացը,- նշեց Կ. Մանոյանը,- այլապես, ինչքան մենք ուշացնենք այս արձանագրությունների գործընթացից դուրս գալը, այնքան դժվարանալու է մեր դուրս գալը։ Ճիշտ է, մեր դուրս գալը կարող է ինչ-որ դժգոհություններ առաջացնել արտաքին ուժերի որոշ շրջանակներում, բայց դա չարյաց փոքրագույնն է, և մենք շատ ավելի թանկ ենք վճարելու այնքան ժամանակ, ինչքան մնալու ենք այս գործընթացի մեջ։

ՀՅԴ Հայ դատի և քաղաքական հարցերի գրասենյակի պատասխանատուն նաև կարծում է, որ Հայոց ցեղասպանությունը ճանաչող բանաձևը ճնշում էր նաև Սպիտակ տան վրա, որպեսզի վերջինը տարբեր պատճառաբանություններով չփորձի խոչընդոտել Ցեղասպանության ճանաչումն ԱՄՆ Կոնգրեսում։

7or.am