Անդրադառնալով Լեռնային Ղարաբաղի հակամարտության կարգավորմանը՝ Հայ ազգային կոնգրեսի համակարգող Լևոն Զուրաբյանն ասել է, թե իրենք հանդիպել են ԵԱՀԿ խորհրդարանական վեհաժողովի նախագահի՝ Լեռնային Ղարաբաղի հակամարտության հարցերով հատուկ ներկայացուցիչ Գորան Լենմարկերի հետ և իրենց վերապահումները հայտնել նրան։

-Մեզ համար բազմաթիվ անընդունելի կետեր կան։ Դրանցից մեկն այն է, որ եթե նախորդ պլաններում խոսվում էր տարածքների դեմիլիտարիզացիայի և խաղաղարար ուժերի տեղակայման մասին, այսօր խոսվում է դիտորդների մասին։ Մենք դա երբեք չենք կարող համարել բավարար երաշխիք Լեռնային Ղարաբաղի բնակչության անվտանգության  համար,-նշել է Լ. Զուրաբյանն ու ավելացրել, որ իրենք ընդունելի չեն կարող համարել Լաչինի միջանցքի միջազգային վերահսկողությունը։

-Մենք պատմական անցյալում ունեցել ենք այնպիսի պահեր, երբ այնտեղ տեղակայված են եղել միջազգային ուժեր (եթե սովետական բանակը համարենք միջազգային), և ոչ մի ապահովություն չի եղել. Լաչինի միջանցքը փակ է եղել, մենք իրականում եղել ենք շրջափակման մեջ,-հայտարարել է ՀԱԿ համակարգողն ու ավելացրել,- ելնելով այդ ամենից՝ մենք չենք համարում, որ Ղարաբաղի կարգավիճակի հարցում բավարար լուծումներ են տրված։

7or.am