ՀՅԴ Բյուրոյի անդամ. «Երբ նախարարը դեռ չէր ծնվել, Դաշնակցությունը բանակցություններ էր վարում»

● Լրահոս

13.03.2010 ● 14:47

ՀՅԴ Բյուրոյի անդամ. «Երբ նախարարը դեռ չէր ծնվել, Դաշնակցությունը բանակցություններ էր վարում»

-Չգիտեմ՝ ում մոտ պատկերացում կար, որ հայ-թուրքական մերձեցում է տեղի ունենում։ Նման բան չենք նկատել այս բանակցությունների ոչ մի փուլում։ Փոխվստահության մթնոլորտ երբեք չի եղել, իսկ որ թուրքական կողմը փորձելու է խաբել, մանևրել և նախապայմաններ փաթաթել Հայաստանի վզին, պարզ էր հենց սկզբից, իսկ թե ինչ հույսեր ուներ հայկական կողմը, ավելի լավ է հարցնել արտգործնախարարին,- հայ-թուրքական հարաբերությունների կարգավորման գործընթացի ներկա զարգացումների մասին խոսելիս ասել է ՀՅԴ Բյուրոյի անդամ Վահան Հովհաննիսյանը։

Հիշեցնելով, որ ՀՀ արտգործնախարար Էդվարդ Նալբանդյանը, պատասխանելով լրագրողներից մեկի հարցին, նշել էր, որ իր հրաժարականը պահանջող ուժերն անպատասխանատու են, և եթե իրենք վարեին բանակցությունները, կհասկանային, թե որքան դժվար է դա՝ Վահան Հովհաննիսյանն ասել է.

-Երբ նախարարը դեռ չէր ծնվել, իսկ հետագայում երբ ծնվել էր ու դպրոց էր գնում, Դաշնակցությունը բանակցություններ էր վարում և հաջողությամբ էր վարում։ Կարծում եմ՝ նախարարի պատկերացմամբ՝ ինքը բանակցություններ վարելու առանձնահատուկ հմտություններ ունի, սակայն եթե բանակցություններ վարելու հմտությունն ամեն ինչին «է՛ստի համեցեք» և «այո՛» ասելն է, այո՛, մենք այդ հմտությունը չունենք։ Մենք այլ կերպ կվարեինք բանակցությունները, իսկ թե նրանց վարած բանակցություններն ինչ արդյունք են տալիս, շատ լավ երևաց ԱՄՆ Կոնգրեսի քննարկումներում,- ընդգծել է Վահան Հովհաննիսյանը։

7or.am