Արթուր Բաղդասարյանի կարծիքով Հայաստանում արտահերթ ընտրությունների ռեսուրս չկա։ Այս մասին մամուլի ասուլիսի ժամանակ լրագրողներին ասել է ՕԵԿ նախագահ Արթուր Բաղդասարյանը։

-Արտահերթ ընտրությունների որևիցե ո՛չ ռեսուրս, ո՛չ էլ քաղաքական անհրաժեշտություն այսօր Հայաստանում չկան, և ես դրանում համոզված եմ։ Ընտրությունները տեղի կունենան ժամանակին՝ 2012թ.՝ խորհրդարանական ընտրություններ, 2013թ.՝ նախագահական։ Մեր կուսակցության կարծիքով՝ արտահերթ ընտրությւոնների մասին խոսելը հիմնավոր չէ,- նշել է նա։

Նա նշել է նաև, որ ինքը նախագահական ընտրություններին չի մասնակցելու, սակայն ՕԵԿ-ը մասնակցելու է 2012թ. խորհրդարանական ընտրություններին։ Թե ի՞նչ ձևաչափով կուսակցությունը կմասնակցի ընտրություններին, Ա. Բաղդասարյանի կարծիքով՝ այդ մասին վաղ է խոսել, սակայն նա նշել է.

-ՕԵԿ-ը և Հանրապետական կուսակցությունը՝ ի դեմս նախագահ Սերժ Սարգսյանի, իրականացնում են ռազմավարական քաղաքական համագործակցություն, ստորագրել ենք փաստաթուղթ, և հետևողական ենք լինելու այդ փաստաթղթի դրույթներն իրականություն դարձնելու մեջ։ Թե ինչ ձևաչափով կմասնակցենք ընտրություններին, ցույց կտա ժամանակը։

7or.am