Քաղաքագետ Ալեքսանդր Մարգարովը լրագրողների հետ հանդիպման ժամանակ մեկնաբանելով Թուրքիայի վարչապետ Էրդողանի այն հայտարարությունը, թե Թուրքիայում ապօրինի բնակվող հայերը կարող են վտարվել՝ ասել է, թե դրանում ակնհայտ սպառնալիք կա։

-Բայց պետք է հարցնել Թուրքիային, թե ինչո՞ւ է ընդամենը 70 000 հայ ապրում Թուրքիայում օրինական կարգավիճակով։ Կարծում եմ՝ թուրքական կողմի համար հարցի պատասխանը լինելու է ինքնասպանության նման մի բան։ Ինչ վերաբերում է 100 000 անօրինական կարգով ապրող հայերին, ապա նշեմ, որ անցկացված հետազոտությունների արդյունքում ստացված թիվը չի համընկնում այդ 100 000-ի հետ, և այստեղ փաստացի սխալ կա։ Այո՛, կա որոշակի սպառնալիք, և որոշ էքսպերտներ դա գնահատում են որպես հարված ղարաբաղյան կարգավորմանը։ Դա ցույց  է տալիս, որ  անհնար է դառնում հայերի և ինչ-որ այլ էթնոսների համատեղ բնակեցումը Ղարաբաղի տարածքում,-նշել է նա։

Պատասխանելով այն հարցին, թե հայ-թուրքական հարաբերությունների հաստատման գործընթացի նախաձեռնությունն ավելի չվատացրե՞ց հայ-թուրքական հարաբերությունները՝ նա նշել է, թե մենք չենք վատացրել այն մարդկանց վիճակը, որոնք ապրում են Թուրքիայում։

-Ուղղակի Թուրքիայի բառապաշարից այս հարաբերությունների խնդիրը դուրս էր։ Սպառնալիքների դիմելու կարիք չկար, և այդ հնարավորությունն ստեղծվել է, երբ սկսվել են հայ-թուրքական հարաբերությունները,-նշել է Ալեքսանդր Մարգարովը։

7or.am