Այսօր ԱԺ ճեպազրույցների ժամանակ ՀՀԿ խմբակցության ղեկավար Գալուստ Սահակյանին հարցրել են՝ մտածե՞լ եք՝ ինչից է, որ սկանդալային պատմությունների մեջ անընդհատ ՀՀԿ պատգամավորներն են հայտնվում։

-Ավելի շատ ձեզնից է,- պատասխանել է Գ. Սահակյանը,- նյութ չունենալով՝ փաստերն այնպես եք ծաղկացնում, կարծես հայոց աշխարհը փլվում է։

Գ. Սահակյանը նշել է նաև, որ թերթ վաճառելու համար լրագրողները սենսացիաներ են փնտրում՝ ավելացնելով, որ, օրինակ, ՀՀԿ պատգամավոր Հակոբ Հակոբյանի կողմից մարտի 17-ի երեկոյան Երևանի Հերացի փողոցում 311 ՕՕ 11 պետհամարանիշի «Շևրոլե» մակնիշի մեքենայով 43-ամյա մի քաղաքացու վրաերթի ենթարկելու մասին լուրն անիմաստ, անհեթեթ, պրովակացիոն է, և ՀՀԿ պատգամավորն այդ միջադեպի հետ կապ չունի։

Գ. Սահակյանը նաև նշել է, որ «վրաերթ» հասկացությունը լրագրողները ճիշտ չեն բնութագրել։

-Վրաերթ կլիներ, եթե խախտում կատարեր մեքնենան։ Խախտումը կատարվել է հետիոտնի կողմից,- ասել է նա։

Իսկ այն ակնարկին ի պատասխան էլ, որ ոստիկանությունից են փոխանցել վրաերթի մասին փաստը՝ Գ. Սահակյանը նշել է.

-Դուք գիտեք՝ ոստիկանությունում մամուլի աշխատողներից ավելի շատ գիտե՞ն։ Վրաերթ նշանակում է, որ օրենք են խախտել։ Եթե իր ճանապարհն է, մեքենան գնում է, դա վրաերթ չի, դա պատահար է։ Ինչ-որ մեկը մամուլի խոսնակ է, որը նույն կրթությունն ունի, չի կարողանում իրավաբանական բառը ճիշտ տեղը դնի։ Ես մեղավո՞ր եմ դրա համար։

7or.am