Ռուսաստանի Դաշնությունում հնդկաձավարի գնի աճը էապես կանդրադառնա Հայաստանում վաճառվող հնդկաձավարի վրա, քանի որ այդ հատիկավորի ներկրումն իրականացվում է ՌԴ-ից: Այս մասին NEWS.am-ի հետ զրույցում ասաց Ագրարագյուղացիական ասոցիացիայի նախագահ Հրաչ Բերբերյանը:

Նրա խոսքով՝ Հայաստանում արտադրվում է երկրին անհրաժեշտ հնդկաձավարի ընդամենը 3%,-ը մնացած 97%-ը ներկրվում է միայն ՌԴ-ից, քանի որ այդ երկիրը հնդկաձավարի արտադրության ոլորտում մոնոպոլ դիրք ունի:

Այս պահին, ըստ մասնագետի, հնդկաձավարի մեծածախ գինը նվազել է մինչեւ 220 դրամ մեկ կիլոգրամի համար:

«Մեր ֆերմերները հնդկաձավար գրեթե չեն մշակում: Հատիկային, կերային կուլտուրաներ մշակող չունենք, մտածում ենք, որ պետք է մշակենք շահութաբեր կուլտուրաներ՝ սոխ, սխտոր, կարտոֆիլ, բանջարեղեն»,-ասաց Բերբերյանը, հավելելով, որ Հայաստանում աճեցված հնդկաձավարի ծավալն այնքան չնչին է, որ որեւէ ազդեցություն չի կարող ունենալ այդ հատիկավոր կուլտուրայի գնագոյացման վրա:

Միաժամանակ, Բերբերյանը չբացառեց, որ հնդկաձավարի թանկացման դեպքում հնարավոր է Հայաստանում ավելանան հնդկաձավարի ցանքատարածությունները, բայց պետության աջակցության՝ սուբսիդավորման պարագայում: «Եթե հովանավորություն լինի, խթանիչ ուժ լինի, սուբսիդավորենք այդ ուղղությունը՝ հնարավոր է ցանքատարածքներն ավելանան, իսկ եթե ինքնահոսի թողենք, կանխատեսելը դժվար է: Հայաստանի նախալեռնային գոտում հնարավոր է աճեցնել հնդկաձավար, բայց միաժամանակ այդ կուլտուրան մշակող մասնագետներ էլ չունենք»,-նշեց Բերբերյանը:

Նշենք, որ, ըստ ռուսական «Ռոսիյսկայա գազետա» կայքի, ՌԴ-ում այս տարի սպասվում է հնդկաձավարի գնի աճ: 2017թ.-ին աննախադեպ բարձր բերքատվության պատճառով հնդկաձավարի 16% գնանկում գրանցվեց, ինչի արդյունքում արդեն 2018թ.-ին արտադրողները նվազեցրեցին հնդկաձավարի ցանքատարածքները 40%-ով` փորձելով այդպես վերականգնել կորուստը:

Մանրամասները՝ NEWS.am-ում։