Վերջերս  հասարակության շրջանում բավական ակտիվորեն քննարկվում է «Մոսկվա» կինոթատրոնի ամառային դահլիճի տեղում համայնավար իշխանության  կողմից քանդված սբ. Պողոս-Պետրոս եկեղեցու վերակառուցման  նախաձեռնությունը: Ի զարմանս մեզ, հերթական անգամ հասարակության  շրջանում ակտիվորեն  հակաքարոզչություն է ընթանում  Եկեղեցու դեմ: Ընդ որում, այդ հակաքարոզչությունն աստիճանաբար վերաձևավորվում է պայքարի ոչ միայն կոնկրետ վայրում եկեղեցի կառուցելու, այլ Հայ Առաքելական սուրբ Եկեղեցու դեմ ընդհանրապես:  Սոցիալ Դեմոկրատ Հնչակյան կուսակցության «Սարգիս Տխրունի» ուսանողական-երիտասարդական միությունը համարում է, որ այն ժամանակ, երբ Հայաստանում օր օրի ավելանում են ազգակործան տարատեսակ աղանդները, երբ վերանում են  բազմաթիվ բարոյական արժեքներ, մեղմ ասած տեղին չէ դեմ խոսել եկեղեցու կառուցմանը:   Ավելին, ամենևին էլ վատ չէր լինի, եթե  բազմաթիվ այլ «էլիտար» կառույցների փոխարեն Երևանի կենտրոնում վեր խոյացած լինեին հոյակերտ եկեղեցիներ' իբրև հայ ազգի աստվածասիրության  առհավատչյա:

Այս հարցում, սակայն, ՍԴՀԿ «Սարգիս Տխրունի» ուսանողական երիտասարդական միությունն ունի երկու վերապահում:

1.Պահանջում ենք, որ սբ. Պողոս Պետրոս եկեղեցին կառուցվի իբրև հայկական եկեղեցական ճարտարապետության դասական նմուշ, այլ ոչ թե այսպես կոչված  «եվրոպական ստանդարտներին համապատասխան էլիտար հերթական  շինություն»:

2.Հայրենի Կառավարությունից պահանջում ենք, որպեսզի զբաղվի ոչ միայն Եկեղեցաշինությամբ այլ Եկեղեցախնամությամբ: Այսօր Հայաստանում կան եկեղեցիներ, որոնք գտնվում են բացարձակ բարձիթողի վիճակում:

Սոցիալ Դեմոկրատ Հնչակյան կուսակցության «Սարգիս Տխրունի» ուսանողական-երիտասարդական միությունը պատրաստ է իր ուժերի ներածի չափով աջակից լինել  Եկեղեցախնամ  սուրբ գործին և  դիմում է բոլոր երիտասարդական ազգային և եկեղեցասեր կառույցներին' միանալ այս կարևոր գործընթացին:

ՍԴՀԿ «Սարգիս Տխրունի» ուսանողական-երիտասարդական միություն