Ինչպես տեղեկացրել էինք, Մոսկվայում մեկնարկել է ռուս–հայկական համագործակցության «Լազարյան ակումբի» 2-րդ համաժողովը՝ «Էկոնոմիկա, ներդրում, ինտեգրում. Ռուսաստանի և Հայաստանի միջև տնտեսական կապերի զարգացման հեռանկարները» թեմայով։

Նիստը բացել է ակումբի հիմնադիր, ՌԴ Պետական Դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը։ Նա ներկաների ուշադրությունն է հրավիրել այն հանգամանքին, որ «Լազարյան ակումբը» ոչ առևտրային ու ոչ պետական նախաձեռնություն է։

Զատուլինը նաև հիշեցրել է, որ ակումբի առաջին նիստը կայացել է Երևանում 2018թ. վերջին և նվիրվել պաշտպանությանն ու անվտանգությանը։

«Մենք ուզում ենք միավորել նրանց, ովքեր ցանկանում են, որ Ռուսաստանի Դաշնությունն ու Հայաստանի Հանրապետությունն ավելի ուժեղ լինեն, որ միմյանց վրա հենվելով կառուցեն իրենց արտաքին քաղաքականությունը»,–ասել է Զատուլինը՝ անդրադառնալով ակումբի նպատակներին ու խնդիրներին և առանձնահատուկ ուշադրություն հրավիրելով երկու երկրների ժողովուրդների պատմական ու մշակութային հնագույն կապերի վրա։

7or.am