Անհատ տաքսու վարորդները՝ մոտ 50 000 մարդ, կազատվեն արտոնագրային վճարից. սա վարչապետ Նիկոլ Փաշինյանի ոչ մեկ անգամ արված հայտարարություն է։ Փաշինյանը նման խոստում է տվել հեղափոխության օրերին, վարչապետի թեկնածու եղած ժամանակ, ինչպես նաև 2019-ի բյուջեի նախագծի քննարկման ժամանակ իր ելույթում, երբ արդեն ՀՀ վարչապետի պաշտոնակատար էր, իսկ երկիրը պատրաստվում էր արտախորհրդարանական ընտրությունների։

Tert.am-ը փորձել է պարզել՝ արդյոք վարչապետը, որը գրեթե մեկ տարի է իշխանության է, կատարե՞լ է իր խոստումը։

Տրանսպորտի, կապի և տեղեկատվական տեխնոլոգիաների նախարարությանն ուղղված մեր հարցմանը, թե արդյոք անհատ տաքսիստներն օրենքով ազատված են 8-ից 12 հազար դրամ վճարելուց, մեզ պատասխանել են, որ գործընթացը դեռևս շարունակվում է գործող օրենքով՝ «Պետական տուրքի մասին» ՀՀ օրենքը դեռևս չի փոփոխվել։

Նշենք, որ գործող օրենքով Երևանում լիցենզավորված տաքսիստներն ամսական վճարում են 12 000, մարզերում` 8000 դրամ:

«Մարդատար-տաքսի ավտոմոբիլներով ուղևորափոխադրումների գործընթացը կանոնակարգվում է ՀՀ օրենսդրությամբ, մասնավորապես՝ «Պետական տուրքի մասին» ՀՀ օրենքի 15-րդ «Տրանսպորտի բնագավառ»-ի 15.5-րդ և 15.6-րդ կետերով մարդատար- տաքսի ավտոմոբիլներով ուղևորափոխադրումներ կազմակերպելու համար կազմակերպությունների, անհատ ձեռնարկատերերի և ֆիզիկական անձանց համար սահմանված են պետական տուրքի դրույքաչափեր»,-ասված է Tert.am-ին տրված պատասխանում։

Միաժամանակ նախարարությունից հայտնում են, որ ՀՀ տրանսպորտի, կապի և տեղեկատվական տեխնոլոգիաների նախարարության կողմից մշակվել էր մարդատար-տաքսի ավտոմոբիլներով ուղևորափոխադրումների գործընթացը կանոնակարգող օրենսդրական փաթեթ, որը ներկայումս լրամշակվում է: Օրենսդրական փաթեթի նոր նախագիծը հանրային քննարկման կներկայացվի e-draft.am կայքում:

Սակայն պետք է նկատել, որ դեռևս 2018 թ-ի նոյեմբերին Կառավարությունն այս ոլորտի հետ կապված փոփոխություններ էր նախատեսել, ըստ որի՝ նախատեսվում էր 10-20 անգամ նվազեցնել տաքսի ծառայություն իրականացնող կազմակերպությունների լիցենզիայի տարեկան տուրքի չափը. «Ավտոմոբիլային տրանսպորտի մասին», «Լիցենզավորման մասին» և այլ օրենքներում փոփոխություններ էր մշակվել Տրանսպորտի, կապի և տեղեկատվական տեխնոլոգիաների նախարարության կողմից։ Բայց այս փոփոխությունների փաթեթում ՀՀ տարածքում անհատ տաքսու վարորդներին բոլոր տեսակի հարկերից ազատելու մասին ոչինչ չկար։

Հավելենք, որ այս տարվա մարտի 7-ին կայացած կառավարության ծրագրում Ֆինանսների նախարար Ատոմ Ջանջուղազյանը ներկայացրեց մի շարք օրենսդրական փոփոխություններ, իսկ փաթեթի մեջ ներառված է նաև ՝ «Պետական տուրքի մասին» ՀՀ օրենքը։ Նշվում է առկա սոցիալ-տնտեսական իրավիճակում պետական տուրքի վճարումը մեծ բեռ է դառնում այս շրջանակի անձանց համար: Թե ինչ ճակատագրի կարժանանան այս օրենքի նախագիծը, դեռևս անհայտ է։

Աղբյուրը՝ Tert.am