Վերջին շրջանում հայ հասարակության տարբեր շերտերում ու մամուլում ավելացել են տարածաշրջանում՝ Լեռնային Ղարաբաղում, հնարավոր ռազմական գործողությունների վերաբերյալ մտավախությունները:

Գյումրիում շատերը կարծում են, որ պատերազմի վերաբերյալ խուճապ ստեղծելու գաղափարը ձեռնտու է հենց իշխանություններին, որպեսզի հետագայում հայ-թուրքական հարաբերություններ կառուցելու ցանկացած սցենար համարվի հասարակության կողմից պատերազմից ավելի գերադասելի: Խուճապային և անհանգիստ տրամադրություն է սերմանում նաև այն տեղեկատվությունը, որ հանրապետությունում իրականացվում են մինչև 50 տարեկան տղամարդկանց հաշվառում ու զորավարժություններ: Սակայն Գյումրիի զինկոմիսարիատից «7օր»-ին փոխանցել են, որ պատերազմական գործողությունների վերաբերյալ բոլոր մտավախություններն անտեղի են: Հանրապետության սահմաններում իրականացվող տղամարդկանց հաշվառումն ամենամյա զինկոմիսարիատի պլանային ծրագրում է: Ամեն տարի կատարվում է  մինչև 50 տարեկան տղամարդկանց հաշվառում, և անցկացվում են պլանային զորավարժություններ: Գյումրու զինկոմիսարիատի փոխանցմամբ՝ այսօր զորավարժություններ են անցկացվում Երևանում, Արմավիրում և մի շարք այլ մարզերում, իսկ Շիրակի մարզում զորավարժությունների անցկացման ժամանակն աշնան ամիսներին է:

Գյումրեցի վերլուծաբանների շարքերում ևս շատացել են պատերազմի վերսկսման հավանականությունը մեծ համարող մասնագետները։ Պատմաբան Արտակ Հովհաննիսյանը կարծիք է հայտնել, որ ներկայիս իրավիճակը շատ նման է 1920թ-ին՝

սոցիալական, ներքին ու արտաքին քաղաքական ճգնաժամ: Նրա խոսքերով՝ պատմությունը ցույց է տալիս, որ երկրի համար հարձակման ենթարկվելու ամենահարմար պայմաններն այսպիսին են: Երբ երկիրն ապրում է նաև ներքին լուրջ խնդիրների մեջ, նա առավել խոցելի է:

«Ադրբեջանը բավական մեծ գումարներ է ծախսում բանակի վրա։ Այնպես որ, լիովին անտեսել պատերազմի սկսման հավանականությունն այդքան էլ ճիշտ չէ կամ, ավելի շուտ, խելամիտ չէ: Պետք չէ ամեն ինչ տեսնել պայծառ լույսի ներքո. կա պատերազմի վերսկսման վտանգ:

Նախագահի առաջարկությունը՝ ստորագրել փոխվստահության կամ չհարձակվելու մասին փաստաթուղթ, խոսում է մտահոգության մասին: Ես համոզված եմ, որ նախագահին էլ է հուզում, ինքն էլ ունի մտահոգություններ, ինչպես Հայաստանի շարքային քաղաքացին: Բայց ոչ մի նախագահ չի ցանկանա (մանավանդ սոցիալ-տնտեսական նման ծանր պայմաններում) ռազմական գործողություններ վերսկսել,-ասել է Արտակ Հովհաննսիյանը:

Դերենիկ Մալխասյան

Գյումրի